Kandidatja demokrate për Shtëpinë e Bardhë Hillary Clinton ka shpallur fitoren gjatë një takimi me mbështetësit e saj në New York. Clinton tha se ky është një moment historik, pasi për herë të parë një grua do të garojë për të qenë presidente e SHBA-së.
Hillary Clinton ka falenderuar të gjithë mbështetësit për ndihmën e dhënë në arritjen e një momenti historik për gratë.
“Falë jush ne kemi arritur një moment historik. Për herë të parë në historinë e vendit, një grua do të jetë kandidate e një partie të madhe dhe do të garojë për të drejtuar Shtëpinë e Bardhë”, tha Clinton.
Zyrtarisht, emërimin si kandidate demokrate Clinton do ta marrë vetëm në kuvendin e partisë në muajin e ardhshëm në Filadelfia, edhe pse ka siguruar shumicën e 2.383 delegatëve të nevojshëm për të mposhtur Sandersin.
Clinton dhe Sanders ishin dje në një takim me presidentin Barack Obama në Shtëpinë e Bardhë. Presidenti ka përgëzuar Clinton për sigurimin e delegatëve të nevojshëm për t’u nominuar si presidente.
8 qershor 2016 (gazeta-Shqip.com)