Fajdet, paratë që ndodhen jashtë shtetit

Prokurorët: Miliona USD janë transferuar edhe në Turqi, Itali, Hungari dhe Austri

Miliona USD, kursime të shqiptarëve, të depozituara në firmat piramidale dhjetë vjet më parë, janë transferuar në Turqi, Itali, Hungari, Austri dhe Zvicër. Krahas depozitave të firmës "Cenaj&Co", që gjenden në bankat greke, prokurorët që kanë përfaqësuar akuzën në hetimet dhe gjyqet e zhvilluara ndaj drejtuesve të firmave rentiere "VEFA", "Gjallica", "Xhaferri", "Populli" etj., konstatojnë se dhjetëra miliona të këtyre firmave gjenden në bankat e shteteve të sipërcituara. Por, sjellja e tyre në Shqipëri, megjithëse janë evidentuar shumat me anën e transaksioneve, nuk mund të realizohet, pasi Shqipëria nuk ka ratifikuar Konventën Evropiane për pastrimin, depistimin, kapjen dhe konfiskimin e produkteve të krimit. Prokuroria e Tiranës tha dje se prokurori Albert Demirneli, i cili ka hetuar një pjesë të firmave piramidale, ka përcaktuar se disa dhjetëra miliona USD të firmës "Vefa" janë transferuar në Greqi dhe Hungari. I njëjti prokuror që ka hetuar edhe firmat rentiere "Cenaj", "Xhaferri", "Populli", "Sude" etj., deklaron në kërkesat për gjykim të këtyre dosjeve se prokuroria disponon dokumente që vërtetojnë se janë kryer dhjetëra transferta parash nëpër banka të huaja, konkretisht në Greqi, Turqi, Itali, Hungari, Austri dhe Zvicër. Zyrtarisht Prokuroria e Tiranës thotë se janë rreth 60 milionë dollarë që janë transferuar, por shuma mund të dyfishohet ose trefishohet nëse të gjitha organizmat e shtetit shqiptar veprojnë të bashkuara për një rihetim të të gjitha shumave të piramidave që kanë dalë nga Shqipëria. Prokuroria e Tiranës saktëson se gjatë viteve nën hetim për firmat huamarrëse është bërë i mundur sigurimi i dokumenteve që vërtetojnë se i njëjti fenomen ka ndodhur edhe me shtetas italianë, turq, austriakë apo hungarezë, të cilët kanë nxjerrë miliona dollarë.

Ndërkohë, Prokuroria e Përgjithshme thotë se përfaqësuesi i organit të akuzës në dosjen "Gjallica", Bilbil Mete, ka dokumentuar që dhjetëra milionë USD të kësaj firmë janë transferuar jashtë shtetit, ndërsa miliona të tjera janë përdorur për qëllime "bamirësie". Gjatë hetimeve, prokuroria ka disponuar dokumente që vërtetojnë se transferta parash janë kryer dhe në shtete të tjera të huaja, përveç Greqisë. Organi qendror i akuzës deklaron se shteti shqiptar, nëpërmjet Ministrisë së Drejtësisë, duhet të hartojë ligje dhe të nënshkruajë konventa jo vetëm me Greqinë, por edhe me shtetet e tjera ku dokumentohet se janë transferuar lekë. "Kemi të gjitha dokumentet dhe bankat ku janë transferuar kursimet e shqiptarëve të depozituara në disa firma piramidale. Mjafton hartimi i ligjeve dhe besohet se paratë do të vijnë dhe mund të shpërndahen", deklaron Prokuroria e Përgjithshme. Por ende një pjesë e mirë e këtyre transfertave vazhdojnë të jenë në formën e llogarive bankare, ndërsa në disa shtete, pas kalimit të viteve, depozitat mund të jenë kthyer në pasuri të paluajtshme.