Vllaznia, të gjithë besojnë te kualifikimi i sigurt

Duhen edhe 90 minuta që Vllaznia të shijojë kualifikimin, por duket se të gjithë në kampin shkodran tashmë e quajnë atë një formalitet. Jo më shumë për dobësi të kundërshtarit, por për besimin që kanë te vetja. Të njëjtën gjë thekson edhe trajneri Agim Canaj, i cili kërkon nga të tijtë që të jenë të kujdesshëm në ndeshjen e kthimit, pasi kundërshtari e demonstroi edhe në Slloveni se nuk e përtyp lehtë eliminimin. "Mund të them se skuadra dha maksimumin në këtë ndeshje, - thotë Canaj. - Morëm një rezultat shumë të mirë. U mbështetëm gjithmonë te forca e grupit. Duke parë që është një tur me dy ndeshje dhe prandaj ne synuam një fitoren që do të na e bënte me të lehtë kualifikimin në shtëpi". Megjithatë ai kërkon kujdes për ndeshjen e kthimit. "Ishte një ndeshje e vështirë, pasi luanin përballë skuadrave më mirë të organizuara në infrastrukturë dhe në shumë drejtime të tjera, - vazhdon më tej trajneri. - Duke e ditur se ata e kanë filluar shumë më shpejt fazën përgatitore dhe kampionatin dhe duke pasur një kontingjent të stabilizuar. Ne kishim besim te forcat tona dhe e nisëm me shumë besim edhe lojën. Kishim mundësi edhe të trefishonim në rastet e shumta që krijuam. Ata na vunë nën presion për gjatë gjithë pjesë së dytë, megjithatë ne ia dolëm. Nëse në ndeshjen e kthimit do të jemi të përqendruar si në ndeshjen e parë, me siguri do të mund të arrijmë kualifikimin".