Infektimi i francezit Pavard, ekipi i Bayern rrezikon karantinën e plotë

E Premte 19 Shkurt 2021, 22:51 Gazeta Shqip

Infektimi i francezit Pavard, ekipi i Bayern rrezikon karantinën e

Koronavirusi shkakton telashe te Bayerni i Mynihut. Sipas “Sportschau”, pas infektimit me COVID-19 të Benjamin Pavard, e gjithë skuadra e Bayernit mund të futet në karantinë. Departamenti shëndetësor në Bavari, po studion mundësinë e marrjes së masave për izolimin e të gjithë futbollistëve që drejtohen nga Hansi Flick.

Autoritetet shëndetësore në Gjermani kanë të drejtë të vendosin në karantinë një ndërmarrje apo shoqëri, në varësi të respektimit të rregullave të parashikuara në protokoll, shkruan supersport. Masat e nevojshme merren në bazë të rezultateve të hetimeve. Për rastin në fjalë, pra të Bayernit, hetimet vijojnë.

Bavarezët luajnë këtë të shtunë kundër Eintrachtit të Frnakfurtit, më pas i pret transferta me Lazion në Champions League. Hetimet do të zbulojnë nëse lojtari i infektuar, në këtë rast Pavard, ka patur kontakte me futbollistët e tjerë të Bayernit. Para francezit rezultoi pozitiv Thomas Muller, ndërsa më herët Goretzka dhe Javi Martinez, tashmë të shëruar.

Imazhet e festës së Botërorit të Klubeve, në të cilën Muller nuk ishte i pranishëm, tregojnë Pavardin duke puthur kupën dhe në kontakt të ngushtë me pjesën tjetër të ekipit. Vijimi i festës në dhomat e zhveshjes tregon që janë anashkaluar të gjitha masat parandaluese. Në orët në vazhdim, autoritetet shëndetësore do të vendosin nëse është rasti për të karantinuar të gjithë ekipin bavarez.