Për çfarë bëhet fjalë? Shakira “u shpall luftë” autoriteteve spanjolle

Për këngëtaren e famshme, Shakira, duket se nuk kanë fund sfidat! Nëna e dy fëmijëve ka një çështje të hapur me autoritetet tatimore në Spanjë, një gjyq që mund të përfundojë edhe me një dënim me 8 vite burg për të.

Mediat e huaja shkruajnë se prokurorët kanë kërkuar një dënim të ashpër për artisten kolumbiane dhe gjithçka për shkak të një mashtrimi tatimor të dyshuar prej 13.9 milionë eurosh.

Lidhur me këto akuza të forta ka reaguar vetë këngëtarja me famë botërore. Shakira është shprehur se po “persekutohej” dhe i akuzoi ata për përdorimin e ‘metodave të papranueshme për të dëmtuar reputacionin e saj dhe për ta detyruar atë të arrinte një marrëveshje zgjidhjeje’.

Por jo vetëm kaq, pasi ish-partnerja e futbollistit të famshëm, Gerard Pique, është e gatshme të dalë para gjykatës dhe nuk pranon asnjë marrëveshje me Thesarin spanjoll.

Ndërkohë kujtojmë se autoritetet spanjolle të tatimit më herët kanë kërkuar nga prokurorët, që të shikojnë çështjet financiare të saj gjatë katër viteve, në mes të vitit 2011 dhe 2014, pasi pretendojnë se ajo mund të ketë shmangur pagimin e taksave.

Sipas të përditshmes spanjolle, “La Vanguardia”, bëhet fjalë për vite në të cilat këngëtarja jetonte në Spanjë, ku sidoqoftë nuk kishte ende rezidencë zyrtare.

Sipas inspektorëve të tatimeve edhe në atë periudhë, Shakira kishte qëndruar në Barcelonë për më shumë se 183 ditë në vit, e si pasojë kishte detyrimin të paguante taksa në vend.

Ata që punojnë me Shakira-n, kanë thënë që bëhet fjalë për një ndryshim kriteresh dhe vlerësimi e jo për mashtrim me taksat.