Dhjetëra aplikime për kalimin e pronësisë, Hipoteka e Lezhës- qytetares: S’ka asnjë aplikim!

Emisioni Fiks Fare solli rastin e një qytetareje nga Lezha e cila endet dyerve të Kadastrës Lezhë prej 2 vitesh.

Suela Kaja ankohet se nuk po kalon dot pronat e të ëmës në emrin e saj edhe pse ajo ka vdekur prej 2 vitesh. Ajo tregon se ka bërë pafund aplikime me zyrë noterie për të kaluar pronat, por asnjëherë nuk është bërë.

Suela thotë se kemi tre pasuri, një e kemi me mbivendosje që edhe kjo është per faji të hipotekës, por e lëmë këtë përse nuk bëhen të tjerat?

Duke qenë se qytetarja nuk ka marrë asnjëherë një përgjigje përfundimtare nga hipoteka i është drejtuar edhe portalit të bashkëqeverisjes , në përgjigje të cilit thuhet  se qytetarja nuk ka aplikuar.

Emisioni Fiks Fare solli bisedën e qytetares me juristen e kadastrës Lezhë, ku kjo e fundit herë thotë se e ka ajo dosjen dhe herë jo.

Në përgjigjet që i jep qytetares ajo është e painformuar për shkresat që qytetarja ka marrë nga institucioni i saj, kështu ajo vendos të tërhiqet dhe të thotë se këto i kanë bërë kolegët. “Me disa aplikime janë marrë kolegët, nuk jam marrë vetëm unë, dhe ata nuk dalin të të takojnë por fshihen” i thotë juristja.

Por jo vetëm aq, fakti që qytetarja është ankuar për këtë zyrë, juristja thotë se e ka personale me të, dhe kështu punonjësja e shtetit i tregon qytetares se burri i saj është shef i antikorrupsionit dhe nuk kanë ardhur në atë punë nga hiçi.

Edhe pse qytetarja kërkonte një përgjigje fikse nga juristja se ku ishte problem i saj, nuk arriti ta merrte në asnjë moment, ndërsa për përgjigjen që është hartuar për bashkëqeverisjen sërish juristja tha se nuk e ka bërë ajo, por koleget e saj.