Lidhje te rendesishme Rrjetet tona shoqërore Shqip merr pjesë në programe të ndryshme marketingu ku mund të përfitojë komisione për produktet e zgjedhura në artikujt e publikuar.

Interesi Publik

Rihapja e shkollave, Ministrja Kushi flet për skenaret se si do të zhvillohet mësimi në arsimin parauniversitar

Rihapja e shkollave, Ministrja Kushi flet për skenaret se si do të

Ministrja e Arsimit, Sportit dhe Rinisë,  Evis Kushi ka reaguar pas sugjerimit më të fundit të Komitetit Teknik të Ekspertëve në lidhje me rikthimin e plotë në skenarin e parë të procesit mësimor në shkollat tona.

“Më në fund, procesi mësimor për të gjithë nxënësit e arsimit parauniversitar nga klasa 1-12, do të zhvillohet në mjediset fizike të shkollave çdo ditë të javës, ndërkohë që të gjitha institucionet tona arsimore janë gati për këtë skenar që në fillim të javës tjetër duke ruajtur dhe respektuar rregullat e higjienës dhe distancimit fizik sikurse janë përcaktuar qartë nga MSHMS”¸ shprehet Ministrja Kushi dhe nënvizon se njësoj si në fillim të këtij viti shkollor, do të lihet në fleksibilitetin e shkollave për të hartuar specifikisht grafikun mbi zhvillimin e procesit mësimor sipas skenarit të parë: qoftë ai me një, dy apo me shumë turne, në varësi të numrit të nxënësve apo kushteve të shkollës.

Ndërsa thekson se kanali i dedikuar “RTSH Shkolla” dhe platforma online “Akademi.al” do të vazhdojnë të jenë në dispozicion të nxënësve dhe mësuesve për të mbështetur procesin mësimor, Ministrja Kushi cilëson se MASR do të jetë maksimalisht e angazhuar për të qenë pranë tyre në çdo moment me qëllim ndihmesën në çdo rrethanë e vështirësi që mund të paraqitet.

Duke falënderuar me shumë mirënjohje mësuesit dhe stafet arsimore për punën e jashtëzakonshme, përkushtimin e sakrificën e treguar, Kushi thotë se përpara është sfida e madhe e provimeve të Maturës Shtetërore dhe mbyllja me sukses e këtij viti shkollor.

“Kam shumë besim se ju do të vazhdoni të punoni intensivisht që maturantët tanë të dalin faqebardhë. Ju lutem, t’i shfrytëzoni këto javë që kanë mbetur për të identifikuar dhe plotësuar të gjitha mangësitë që mund të jenë krijuar gjatë mësimit online”, apelon ajo.

“Përfaqime të sinqerta për të gjithë ju, nxënës të dashur, që deri më tani ia dolët të përballeni e të përshtateni shumë shpejt me një vit aspak të lehtë! Një bravo të madhe edhe për përgjegjshmërinë që vazhdoni të reflektoni çdo ditë në shkollat tona dhe jashtë tyre!”, i drejtohet Ministrja Kushi të gjithë nxënësve.

Ndër të tjera, ajo shpreh mirënjohjen e thellë për të gjithë prindërit, që megjithë të papriturat e rezervuara nga pandemia COVID-19, durimi i secilit prej tyre ka ndihmuar të kapërcejmë këtë sfidë për realizimin e qëllimit të përbashkët, arsimimin sa më të mirë të fëmijëve tanë.
“Ne ia dolëm me sukses vetëm falë bashkëpunimit, mirëkuptimit dhe solidaritetit që treguam të gjithë për njëri-tjetrin!”- nënvizon ministrja.

Denonco

Keni informacion në interes të publikut? Dërgojeni në Shqip duke klikuar këtu.

Poll

Zgjedhje 2021

Ndiqni të gjitha lajmet e fundit
në rrjetet tona shoqërore