Lidhje te rendesishme Rrjetet tona shoqërore Shqip merr pjesë në programe të ndryshme marketingu ku mund të përfitojë komisione për produktet e zgjedhura në artikujt e publikuar.

Arti

Pirateria/ Drejtoresha e QKL-së, Bardhyli apel për ndërgjegjësim kombëtar: Pronësia intelektuale, pasuri e patjetërsueshme e një vendi

Pirateria/ Drejtoresha e QKL-së, Bardhyli apel për

Shqipëria hyn në vendet ku pronësia intelektuale është ende e rrezikuar. Prej vitesh tregu i librit është i prekur nga informaliteti dhe pirateria.

Referuar këtij problemi, Qendra Kombëtare e Librit dhe Leximit, bashkë me Shoqatën e Botuesve Shqiptarë, organizuan sot një tryezë diskutimi me temë “Libri përballë informalitetit”, ku ishin të pranishëm disa prej botuesve më të rëndësishëm shqiptarë, si: Petrit Ymeri, njëkohësisht edhe kryetar i Shoqatës së Botuesve, Flutura Açka, Gëzim Tafa, Irena Toçi, Jani Malo, Arlinda Dudaj, Anila Bisha, Genti Gjonaj dhe botimet “Pegi”. I pranishëm ishte edhe drejtori i Pronësisë Intelektuale pranë Inspektoratit të Mbikëqyrjes së Tregut, Neritan Frashëri.

“Trashëgimia intelektuale është një pasuri e patjetërsueshme në jetën e një vendi, ndaj QKLL-ja është e angazhuar për të punuar që t’i japë më shumë vizion dhe dinjitet autorit shqiptar. Ky takim sot, por edhe takimet e mëparshme, na kanë bërë të reflektojmë mbi këto problematika, duke e parë partneritetin mes përfaqësuesve direkt të kësaj çështjeje, si botuesit, autorët, zyra e së drejtës së autorit, Inspektoratit të Mbikqyrjes së Tregut, si thelbësor për ndërgjegjësim, duke vënë në zbatim Ligjin për të Drejtën e Autorit, por edhe duke menduar për një rishikim të problematikave, të cilat mund të reflektoheshin më fort në ligj”, u shpreh drejtorja e QKLL-së, Alda Bardhyli.

Sipas saj, hapi i parë konkret ka të bëjë me ndërgjegjësimin, por dhe me marrjen e masave që do të çonin në ndëshkueshmërinë e gjithë atyre që tjetërsojnë pronën intelektuale.

Petrit Ymeri, duke i njohur më në brendësi problematikat e shprehura edhe nga kolegët e tjerë botues, u shpreh se sektori i editorisë në Shqipëri është një sektor ku po spekulohet shumë dhe është gjithnjë i pambrojtur përballë piraterisë.

Ai ngriti në këtë tryezë problemin e fotokopjimit pa leje të librave pranë fakulteteve, botimi i librave pa të drejtën e autorit dhe piratimi nga persona të dytë i veprave, të cilët i shesin nëpër tezga, skanimi i librave pa leje dhe nxjerrja e tyre në faqet e internetit, të cilat ua shesin lexuesve kundrejt një pagese. Ymeri u shpreh se për këto probleme janë bërë disa sinjalizime kundrejt institucioneve përkatëse.

Ndërkohë, Neritan Frashëri tha se Inspektorati i Mbikëqyrjes së Tregut është vënë në dijeni për këto problematika dhe është ngazhuar në zgjidhjen e tyre, edhe pse terreni i veprimit ka qenë i vështirë, por që janë marrë masa serioze për rinisjen e punës. Ai u shpreh se një prej gjërave më të rëndësishme, e cila ndihmon në zgjidhjen e këtyre problematikave, është edhe ndërgjegjësimi i vetë shoqërisë ndaj fenomeneve të tilla, të cilat duhen trajtuar si vepra penale të dënueshme.

Në fund të këtij takimi, u ra dakord që të gjitha palët, institucionet, Qendra Kombëtare e Librit dhe Leximit, Shoqata e Botuesve Shqiptarë dhe vetë botuesit, të bashkëpunojnë, duke bashkërenduar punën e tyre, deri në ndërgjegjësimin dhe zgjidhjen e këtyre problematikave.

“Bashkë me Inspektoratin e Mbikëqyrjes së Tregut dhe ky një institucion i ri, kemi nisur të bashkëpunojmë, referuar dhe ndryshimeve të fundit të Ligjit 9947 ‘Për Pronësinë Industriale’. Mbrojtja e Pronësisë intelektuale është një prioritet kombëtar, ndaj dhe bashkëpunimi ynë është parësor në këtë luftë të përbashkët”, tha Bardhyli.

Denonco

Keni informacion në interes të publikut? Dërgojeni në Shqip duke klikuar këtu.

Poll

Aktualitet

Ndiqni të gjitha lajmet e fundit
në rrjetet tona shoqërore