“Shqiptari hyri me forcë në shtëpinë e një 59-vjeçarjeje”/ Media britanike: Telefonoi mikun e tij dhe i kërkoi një avokat…

Media britanike Daily Mail ka publikuar një investigim për krimet ku janë përfshirë emigrantët e paligjshëm që kanë udhëtuar drejt Mbretërisë së Bashkuar.

Në shkrimin e publikuar, trajtohet arrestimi i një të riu shqiptar më 23 tetor të këtij viti i cili kishte udhëtuar me gomone drejt Mbretërisë së Bashkuar.

Daily Mail shkruan se shqiptari, emri i të cilit nuk bëhet i ditur, kishte hyrë me forcë brenda shtëpisë së një shtetaseje britanike.

Ai kishte hyrë në banesën e Sue Doyle dhe kishte përdorur celularin e saj për të kontaktuar me një shtetas shqiptar, Rezart Balesin 40 vjeç.

Ky i fundit, sipas medias britanike, është i kërkuar në Shqipëri për pastrim parash. Gjithashtu, i riu shqiptar i kërkoi britanikes që ta transportonte drejt Londrës ose Mançesterit.

Mesazhi i fundit i tij drejtuar 40-vjeçarit Balesi ishte shkruar në shqip: Mendoj se më gjetën. Më siguro një avokat. Policia ka hyrë në shtëpi.

Pas kësaj ngjarje, vijon shkrimi, shtetasja britanike ishte larguar nga shtëpia e saj ku kishte jetuar prej 30 vitesh.