Policia e refuzoi, Berisha reagon i vendosur për tubimin e 6 dhjetorit: Do të jetë protestë që nuk është parë ndonjëherë...

Edhe pse Policia e Shtetit e ka refuzuar zyrtarisht protestën e Partisë Demokratike të 6 dhjetorit, duket se kreu i partisë më të madhe opozitare, Sali Berisha nuk tërhiqet.

Në një komunikim me qytetarët Berisha është shprehur se ajo do të jetë protesta më e madhe dhe një formë e shprehjes së vullnetit të qytetarëve.

Kryetari i Partisë Demokratike, Sali Berisha tha ndër të tjera dje se pavarësisht refuzimit nga policia për protestën para kryeministrisë, ajo do të mbahet aty ku është paralajmëruar.

“Policia e shtetit njoftoi mbrëmë se nuk njeh kushtetutën dhe ligjet. Policisë i rikujtoj se Kushtetuta nuk njeh kufizimin për protestat dhe liritë e qytetarëve, por krahas kësaj ka një vendim të Kushtetueses në të cilin ajo vendos që protestuesi nuk ka asnjë detyrim të njoftojë policinë. Prandaj ai refuzim është i paqenë.

Edi Rama po e trajton Samitin e liderëve të BE-së sikur këtu të mblidheshin të gjithë diktatorët e botës, në një kohë kur të gjithë ata që vijnë në Tiranë janë burra dhe gra të zgjedhur me votë nga qytetarët e tyre.

KE-ja për të sqaruar pozicionin në raport me të drejtën e qytetarëve për protesta, kërkoi publikisht që e drejta e qytetarëve të respektohet. Refuzimi tregon fytyrën e vërtetë të regjimit që është i tmerruar nga populli shqiptar. Në këtë protestë në datën 6 në orën 12 do të vërshojnë të gjithë ata të cilët ëndrrën europiane e kanë më të çmuarën për të ardhmen e fëmijëve të tyre. Do të jetë një protestë që nuk është parë ndonjëherë”, tha Berisha.