“Do të hash një banane?”/ Prangoset farmacisti që puthi me zor klienten dhe tregtonte barna kontrabandë

Policia e Tiranës ka njoftuar se është arrestuar 53-vjeçari H.R., pas denoncimit të bërë se tregtonte barna të kontrabanduara.

Në denoncim u raportua se në farmaci shiteshin kokrra aborti nën dorë në mënyrë ilegale. Gjithashtu farmacisti ngacmoi seksualisht, klienten që u paraqit në farmaci, e infiltruar.

Sakaq materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme.

Në lidhje me rastin e transmetuar në emisionin investigativ , që bënte fjalë për një shtetas (farmacist) që tregtonte barna të kontrabanduara, ju sqarojmë se:

Shërbimet e Seksionit të Hetimit të Krimeve Ekonomike dhe Financiare të DVP Tiranë, menjëherë pas publikimit të pamjeve filmike, organizuan punën për kapjen dhe vënien përpara përgjegjësisë ligjore të shtetasit që shfaqet në video.

Në vijim të veprimeve, specialistët për Hetimin e Krimeve Ekonomike dhe Financiare arrestuan shtetasin:

– H. R., 53 vjeç, banues në Tiranë, për veprat penale “Kontrabanda me mallra të tjera”, “Tregtimi dhe transportimi i mallrave kontrabandë” dhe “Fshehja e të ardhurave”.

Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme.

Drejtoria Vendore e Policisë Tiranë falënderon mediat dhe qytetarët që denoncojnë rastet e paligjshmërisë dhe i fton sërish ata që të denoncojnë çdo rast paligjshmërie, në numrin 112, duke iu garantuar anonimat të plotë dhe reagim të menjëhershëm e të paanshëm.