Dita e sotme nis me mot të qëndrueshëm por të ftohtë, zbuloni çfarë sjell pasditja

Sipas MeteoAlb: Qarkullimi i masave ajrore nga veri—verilindja e kontinentit do të sjellë mot të qëndrueshëm por të ftohtë në vendin tonë. Për pasojë kthjellimet do të jenë dominante, përjashtuar zonat verilindore dhe juglindore ku do të ketë reshje të izoluara dëbore. Parashikohet që: pasditja dhe mbrëmja të mbeten nën ndikimin e kthjellimeve dhe vranësirave të shpeshta në të gjithë territorin shqiptar.

Temperaturat e ajrit do të pësojnë rënie në mëngjes dhe në mesditë duke luhatur vlerat ditore nga -3°C deri në 12°C. Era do të fryjë mesatarisht me shpejtësi 40 km/h nga drejtimi verilindor duke krijuar në brigjet detare dallgëzim 3 ballë.

Kosova

Masat ajrore të ftohta me origjinë nga Verilindja e kontinentit Evropian kanë depërtuar në rajonin e Ballkanit, duke bërë që të vijojë rënia e temperaturave të ajrit në të dy vlerat ekstremale ditore. Vranësirat e shpeshta mbeten dominuese në Kosovë, KU herë pas here do të zhvillohen duke gjeneruar reshje dëbore në të gjithë territorin. Reshjet do të jenë prezente deri në orët e pasdites, por në vijim pritet përmirësimi i motit.

Maqedonia e Veriut

Deri në orët e pasdites MV parashikohet të jetë në mbizotërimin e vranësirave të shumta, të cilat do të pësojnë zhvillime duke gjeneruar reshje dëbore në të gjithë territorin. Pritet që më të dukshme reshje të jenë në zonat Veriore dhe Lindore. POR gjatë mbrëmjes dhe natës vonë do të kemi përmirësim gradual të kushteve të motit në pothuajse të gjithë territorin e MV.

Rajoni dhe Europa

Një qendër e fuqishme ciklonare përkatësisht në perëndim dhe veriperëndim të Europës do të bëjë që; ishujt Britanikë dhe gadishulli skandinav të përjetojnë reshje të dendura shiu, stuhi të forta ere si edhe reshje të dendura dëbore. Po ashtu, reshje dëbore do të këtë edhe Ballkani por në sasi të pakta. Ndërsa e gjithë pjesa tjetër e Kontinentit Europian do të jetë në ndikimin e kushteve të qëndrueshme atmosferike, ku moti i kthjellët por i ftohtë do të jetë dominant.