Koronavirusi: Vaksinë e posaçme gripi për fëmijët deri në 6 vjeç e moshat mbi 60 vjeç

Ministria italiane e Shëndetësisë po vlerëson mundësinë e zgjerimit të rekomandimeve për vaksinimin ndaj gripit edhe të fëmijëve nga 0 deri në 6 vjeç, si dhe të moshave mbi 60. Në këtë mënyrë, me vaksinën e re që del në vjeshtë, do të zgjerohej spektri i publikut “ të vaksinueshëm”, që aktualisht parashikohet (dhe është falas) vetëm për fëmijë dhe të rritur me patologji që rrisin rrezikun e komplikacioneve, si dhe për personat mbi 65 vjeç.

Ministria ne fjale pritet të nxjerrë shumë shpejt qarkoren e re për vaksinimin ndaj gripit, shkruan SHQIP. Ky dokument është hartuar në mënyrë të pashmangshme këtë vit me në fokus edhe pandeminë e  Covid-19, dhe kthimit të mundshëm të infeksionit në shkallë të gjerë gjatë stinës së ftohtë. Zgjerimi i numrit të personave të vaksinuar, thonë ekspertët, do të ndihmonte në shmangien e asaj që ndodhi në shkurt, kur simptomat e gripit u ngatërruan me ato të Covid 19, duke vonuar ndërgjegjësimin ndaj sëmundjes së re.

Sipas ekspertëve vendas, vaksinimi kundër gripit tek fëmijët e moshës 6 muajsh deri në 6 vjeç, do të kishte rezultate të shkëlqyera, sepse kjo do të thotë më pak sëmundje në radhët e tyre, dhe më pas vizita nëpër klinika e spitale.