Kuvendi kërkon hetime për përkthyesen, pas videos së publikuar në rrjetet sociale

Në një video të publikuar nëpër rrjetet sociale, dëgjohet një përkthyese e Kuvendit të Kosovës, e cila ndërsa përkthen fjalimin e një deputeteje nga gjuha turke në atë shqipe, dëgjohet duke lëshuar zëra të çuditshëm.  Për këtë video, ka nisur hetimet edhe Kuvendi.

Rasti ka ndodhur gjatë seancës së Kuvendit për Ditën Ndërkombëtare të Gruas, të mbajtur më 9 mars. Në një komunikatë për media, zyra e sekretarit të Kuvendit të Kosovës ka theksuar se përkthyesja zyrtare e gjuhës turke ka munguar për shkaqe shëndetësore.

“Në seancën e Kuvendit të Republikës së Kosovës, të datës 9 mars 2020, në mungesë të përkthyeses zyrtare të gjuhës turke (për shkaqe shëndetësore), Grupi Parlamentar 6+, në mirëkuptim, ka angazhuar për përkthim nga gjuha turke në atë shqipe dhe anasjelltas një të angazhuar në grup. E njëjta, në këtë angazhim jashtë punës së saj të kontraktuar, ka përkthyer me kapacitetin e saj“, thuhet në komunikatë.

Po ashtu, Kuvendi ka kërkuar hetime lidhur me videot e publikuara në rrjete sociale, ku përktyesja dëgjohet duke lëshuar zëra të çuditshëm ndërkohë që përkthen në gjuhën shqipe, fjalimin e deputetes së 6+.

“Duke pasur parasysh se një videoxhirim nga seanca është bërë viral në media online dhe rrjete sociale, i nxjerrë jashtë kontekstit, Zyra e Sekretarit të Përgjithshëm të Kuvendit të Republikës së Kosovës ka kërkuar nga organet kompetente të zhvillojnë hetime përkatëse për vlerësimin e gjendjes faktike“, thekson komunikata e Kuvendit të Kosovës.