Dalin sondazhet/ Dy partitë që dalin të parat në Kosovë, ja kush i fiton zgjedhjet

Lidhja Demokratike e Kosovës dhe Lëvizja Vetëvendosje do të dalin partitë e para në zgjedhjet e jashtëzakonshme parlamentare që pritet të mbahen në Kosovë në rast të shpërbërjes së Kuvendit, ka konstatuar instituti i njohur slloven, IFIMES.

Sipas një analize të IFIMES, orientimi i qytetarëve para zgjedhjeve të mundshme shkon në favor të Vetëvendosjes si parti e parë dhe LDK-së si parti e dytë.

IFIMES parasheh që Partia Demokratike e Kosovës të renditet e treta, ndërkaq pas saj të vijë Aleanca për Ardhmërinë e Kosovës, partia e kryeministrit në dorëheqje, Ramush Haradinaj.

Partitë tjera politike siç janë Aleanca Kosova e Re dhe Partia Socialdemokrate, në bazë të të dhënave të këtij instituti, nuk mund ta kalojnë pragun prej 5 përqind, shkruan Insajderi.

Duke rikujtuar se minoriteteve sipas Kushtetutës u jepen 20 ulëse në parlamentin 120 anëtarësh, IFIMES shkruan se mbështetjen më të madhe sikur edhe para zgjedhjeve tjera parlamentare, sipas sondazheve, e gëzon Albin Kurti si kandidat për kryeministër. Por aty thuhet se ende ekziston rreziku që zgjedhjet e reja të parandalohen pasi dy partitë në qeverinë në largim, PDK dhe AAK, do të jenë humbës të këtyre zgjedhjeve.

Sipas raportit të IFIMES, analistët në Kosovë kanë vërejtur se zgjedhjet e parakohshme parlamentare me shumë mundësi do të zgjidhnin situatën ekzistuese të komplikuar dhe do të sillnin një qeveri të re legjitime, e cila do të ishte e gatshme të përballet me sfidat e luftimit të krimit dhe korrupsionit, duke siguruar zhvillim ekonomik dhe parandalim të emigrimit masiv

Kryesia e Kuvendit të Kosovës ka vendosur që më 22 gusht të mbahet senacë e jashtëzakonshme për shpërbërjen e Kuvendit.