UEFA shpërblen Kosovën, merr pjesë me 3 skuadra në kompeticionet e futbollit europian

Vetëm 3 vite pas pranimit të Kosovës në gjirin e UEFA-s, Federata e Futbollit të Kosovës ka dhënë këtë të premte një tjetër lajm pozitiv për futbollin kosovar. Numri i skuadrave pjesëmarrëse në kompeticionet e qeverisë së futbollit europian do të shkojë në 3, nga dy që ishte deri më sot.

Sipas skemës së re, ekipi kampion i Kosovës do të luajë në kualifikueset e Champions League, ndërsa ekipi nënkampion dhe ai fitues i Kupës së Republikës së Kosovës do të luajnë në kualifikueset e Europa League.

“Edhe pse realisht ende nuk është arritur koefiçenti i kërkuar për më shumë skuadra pjesëmarrëse, pas takimit të sotëm që presidenti Ademi dhe sekretari i përgjithshëm Salihu patën me përfaqësuesit e UEFA-s, këta të fundit kanë pranuar që ta shpërblejnë FFK-në me një klub më shumë në garat evropiane. Që nga edicioni i ardhshëm, nga kampionati i Kosovës do ta sigurojnë pjesëmarrjen në garat europiane kampioni, nënkampioni dhe fituesi i Kupës. Pa dyshim ky është një lajm i shumëpritur dhe i cili do të ndikojë edhe më shumë në rritjen e konkurrencës në elitën e futbollit tonë, e njëherësh do të rrisë edhe nivelin e organizimit në Superligë”, thuhet në njoftimin e FFK-së.









Comments are closed, but trackbacks and pingbacks are open.