“Burg për ‘bandat’ që s’hyjnë ose pengojnë zgjedhjet”, Balliu i përgjigjet Ballës e Lleshajt

Sekretari i Përgjithshëm i PS, Taulant Balla kërcënoi sot nga Elbasani me burg, drejtuesit e opozitës, nëse ata tentojnë të pengojnë zhvillimin e zgjedhjeve të 30 qershorit.

Përgjigjja e parë nga ana e PD-së ka ardhur nga “Unaza e Re’, aty ku ish-deputeti demokrat Klevis Balliu bashkë me banorët e Astirit ka thënë se “qeveria Rama do luftë”.

“Taulant Balla, të dëgjova sot kur the se do të dënohen me 7 vjet burg ata që do të pengojnë zgjedhjet e 30 qershorit. Ja ku po të them nga Unaza, këtu ku keni vjedhur e rrjepur me projekte korruptive, se zgjedhje më 30 qershor nuk do të ketë. Zgjedhje fasadë nuk do të ketë dhe nuk do të lejojmë që të ketë. Ju keni kokë staliniste. Nuk kuptoni dot pluralizmin. Fuqia qytetare do iu dërgojë në plehra ju dhe të gjithë sojin tuaj të kriminalizuar. Meqenëse iu hodhët këtë propozim, unë propozoj që të shkojnë në burg ata që hanë e pinë me kriminelë, ata që flasin në telefon me kriminelë”, tha Balliu.

Klevis Balliu kishte një thirrje edhe për ministrin e Brendshëm Sandër Lleshaj, i cili tha së fundmi se do të konsiderohen banda ata forca politike që nuk hyjnë në zgjedhje.

“Sandër Lleshaj që kur është bërë ministër nuk godet krimin, por opozitën. Unë iu garantoj se zgjedhje fasadë nuk do të mbahen. Opozita nuk do të ulet në tryezë as me Edi Ramën. Opozita nuk ulet në tavolinë me njerëz të droguar”, u shpreh ish-deputeti.









Comments are closed.