Kandidatët, Duma: E gatshme si për Tiranën, ashtu dhe për Durrësin

PD i jep PR-së, Beratin. Basha asnjë bashki për PDK-në, Ndoka paralajmëron ikjen

Sondazhi - PR-ja ka bërë një sondazh të fundit edhe për kandidimin e Dukës si kandidat i PR-së përballë dy kandidatëve të PD dhe një të PS dhe rezulton se është fitues

Kandidatët - Gjatë këtyre ditëve, PD-ja ka zyrtarizuar gjithsej 26 emrat e saj që do të garojnë në zgjedhjet vendore, ku vetëm njëri i përket aleatëve të PR-së

Pakënaqësia - Demokristianët i vlerësojnë negociatat me nota negative, duke theksuar se PD-ja nuk ka një vlerësim real për aleatët dhe kandidatët po i shpall në mënyrë të pakonsultuar

HERION MESI Koordinatorja e marrëdhënieve me publikun në PD, Grida Duma, është gati të kandidojë për postin e kryetares së cilësdo prej bashkive, qoftë asaj të Durrësit, qoftë edhe për Bashkinë e Tiranës, mjafton që partia t'ia ngarkojë një detyrë të tillë. Kjo për faktin e thjeshtë se sa më shumë i largohet Agron Dukës mundësia për të kandiduar si përfaqësues i opozitës në Durrës, aq më shumë kjo mundësi afrohet për Grida Dumën. Duke qenë se ajo është propozuar nga anëtarësia e PD-së si në Durrës ashtu dhe në Tiranës, interesimit të gazetarëve, ajo i përgjigjet çështjes parimisht. "Unë e vlerësoj maksimalisht zotin Duka, në qëndrimin e tij të drejtpërdrejtë dhe në zhvillimin e karrierës së tij politike në mënyrë të respektueshme, por mbetet e vërtetë që Durrësi është një bastion me një zemër të djathtë dhe për këtë arsye duhet të konsiderojmë edhe kandidaturat e Partisë Demokratike deri sa të dilet me një emër të përbashkët",- tha Duma. Dhe duke u ndalur te propozimi i emrit të saj për të qenë kandidate edhe për Bashkinë e Tiranës, Duma la të kuptohej se deri tani nuk ka pasur një komunikim me kryetarin Lulzim Basha për këtë çështje. "Ky është një vendim në grup, përgjigjen do ta kthej vetëm kur kryetari të jetë në diskutime. Nuk është e mjaftueshme që një figurë të jetë thjeshtësisht e pëlqyeshme nga publiku, mund të ketë dhe duhet të ketë shumë kritere të tjera për kandidatin. Emri i kandidatit është një çështje e brendshme e Partisë Demokratike", shtoi Grida Duma. Por pavarësisht se kush do të vendoset në Tiranë apo Durrës, e sigurt është se në Tiranë do të kandidojë një përfaqësues i PD-së. Duma është një ndër katër kandidatët e përfolur për të marrë timonin e drejtimit të Bashkisë së Tiranës, mes Jorida Tabakut, Halim Kosovës dhe Besnik Aliaj. Republikanët Dje opozita kandidoi në Berat Kasem Mahmutaj, një propozim ky i Partisë Republikane, që tregon se bisedimet mes palëve po ecin edhe pse publikisht Durrësi duket si një çështje ende e hapur. "Nuk ka një vendim përfundimtar. Sondazhi është pozitiv për zotin Duka dhe ne duam që të bëjmë atë që është më e mira. Kemi pritur me zotin Duka që të dalë një propozim nga Partia Demokratike që ta vlerësojmë, për të parë edhe kapacitetet elektorale, qoftë të Partisë Republikane, qoftë me zotin Duka sa mund të mundësohen pozitivisht në raport me kandidatin që propozohet. Nuk kemi kandidat tjetër. Jemi afër dhe larg një marrëveshjeje", deklaroi Fatmir Mediu. Ai tha se do të jetë asambleja e kësaj partie, e cila do të vendosë se si do të dalin në zgjedhje, të vetëm apo në koalicion me PD-në. "Nuk kemi vënë asnjë kusht për asnjë emër në asnjë bashki, kemi dashur që të fitojmë, ky është i vetmi kusht. Ne do ta diskutojmë me zotin Duka kandidimin i tij si kandidat i PR, vendimi u mbetet strukturave dhe asamblesë së PR dhe vetë zotit Duka. Nuk ka ende asnjë vendim zyrtar",- tha Mediu. Demokristianët Partia Demokristiane konfirmon mosarritjen e konsensusit me Partinë Demokratike për formimin e një koalicioni për zgjedhjet e 21 qershorit. Kreu i PDK-së, Nard Ndoka, i kontaktuar nga gazeta "Shqip", zyrtarizoi lajmin se PDK-ja është drejt daljes së vetme në zgjedhje ose me një koalicion tjetër, pas dështimit të negociatave me partinë më të madhe opozitare. "Po bëjmë nxemjen për të dalë nga koalicioni. Pasi nxehja nuk bëhet vetëm për t'u futur, por edhe për të dalë", - tha Ndoka. Sipas kreut të demokristianëve, Partia Demokratike vazhdon të gabojë duke shpallur kandidatura të pakonsultuara më parë. Fillimisht, mësohet se PDK-ja kishte kërkuar nga Partia Demokratike 6 bashki, por ky propozim duket se nuk është pranuar nga PD-ja. Pas largimit të PDIU-së dhe negociatave ende të mbetura pezull me Partinë Republikane, tashmë me largimin edhe të Partisë Demokristiane, duket se opozita është më e përçarë se kurrë dhe Partia Demokratike është duke shkuar drejt daljes pa asnjë aleat të fuqishëm në zgjedhjet e 21 qershorit.