Dritëhije komploti, Taçi dhe azerët pas ofertës së majme?!

Luhet me amerikanët, por fshihen të tjerë emra

Gara – Nga 19 kompani që kishin tërhequr dokumentet e tenderit, vetëm 6 i dorëzuan ofertat, por nga verifikimi paraprak, vetëm 3 konsiderohen të vlefshme

Afati – Ministria e Ekonomisë nuk dha detaje se sa do të zgjasë procedura e vlerësimit të ofertave, pasi edhe në ligjin e privatizimeve, nuk ka një limit ligjor

Ofertat – Komisioni fillimisht do të shqyrtojë vlefshmërinë e ofertave për të parë nëse përmbushin kriteret e kualifikimit, rezultati i të cilit mësohet pas një jave

Pak orë pas hapjes së ofertave në tenderin e shitjes së “Albpetrol” dhe ofertës surprizë, nisin e dalin në dritë edhe dyshimet dhe pikëpyetjet e para. Konsorciumi i përbërë nga “Vetro” dhe “Silk Road Equity”, që ofroi çmimin më të lartë prej 850 milionë eurosh, të paktën nga të dhënat që mund të merren publikisht, nuk rezulton të ketë përvojë në fushën energjetike, kriter detyrues për blerësin e “Albpetrol”-it.

“Silk Road” është një fond amerikan investimesh nga Çikago, ndërsa “Vetro” një kompani nga Singapori, për të cilën ekzistojnë shumë pak informacione publike.

Por dyshimet që lidhen me kriterin strategjik nuk janë të vetmet. Madje, janë të tjera fakte ato që hedhin dyshimet më të forta mbi këtë privatizim, ende në tentativë. Në tender ky konsorcium përfaqësohej zyrtarisht nga Essad Puskar, një boshnjako-amerikan shumë i njohur deri tani jashtë Shqipërisë, veçanërisht në Kosovë. Puskar, i pyetur nga gazeta “Shqip”, pas tenderit, tha se oferta ishte paraqitur nga zyra e Singaporit, por qendra e bashkimit të shoqërive ishte në Çikago të SHBA-së.

Puskar, një personazh kontrovers, ishte njeriu në qendër të skandalit që shoqëroi zgjedhjen e Behxhet Pacollit president në Kuvendin e Kosovës, më 22 shkurt të vitit të kaluar.

Gjatë seancës për zgjedhjen e Pacollit ishte pikërisht ky individ që shërbente si ndërmjetës në komunikimet me mesazhe mes ish-ambasadorit amerikan në Prishtinë, Chris Dell, dhe vetë zotit Pacolli. Nga lëvizja “Vetëvendosje”, ai është pagëzuar me emrin “Damir Fazlliçi i Kosovës”. Ky i fundit, ndoshta jo fort rastësisht, mbërriti në Tiranë mbrëmjen e vonë të së enjtes, i përfolur si lobues për një tjetër kompani në tender.

Mesa duket, betejën e ndërmjetësve kontroversë deri tani, e ka fituar boshnjaku më i ri. Por në fakt, lidhjet e Puskar nuk janë të forta vetëm në Kosovë.

Nga një kërkim i thjeshtë në internet zbulohet se Puskar ka shërbyer edhe si këshilltar i parë i një biznesmeni të njohur dhe po kaq kontrovers në fushën energjetike në Shqipëri, Rezart Taçi.

Të dy i bashkon edhe një histori me Azerbajxhanin. E ndërsa Taçi së fundmi është përballur me probleme në gjykatë me Bankën Kombëtare Azere, për një borxh prej 75 milionë eurosh për blerjen e ARMO-s, Puskar ka qenë aktiv në Baku muajt e fundit, me takime të nivelit të lartë dhe premtime për hapësira të reja investimi në Europë.

Kjo lidhje po risjell në vëmendjen e publikut një skenar të ngjashëm pak vite më parë, kur qeveria shqiptare privatizoi pikërisht ARMO-n. Edhe në atë kohë, fillimisht u tha se blerësi ishte një kompani amerikane nga Teksasi, por që më vonë rezultoi të ishte Rezart Taçi.

Amerikanët nuk u dukën asnjëherë në Shqipëri dhe emri i tyre nuk u lakua më, pas përfundimit të tenderit. Përfshirja e Puskar në tenderin për ‘Albpetrol” i shton edhe më shumë dyshimet se kush qëndron pas ofertës për blerjen e “Albpetrol”-it.

Nga vijnë paratë dhe kush është e mund të jetë vërtet pronari i ri i “Albpetrol”, amerikanët e konsorciumit apo azerët e “Socar”?

 

Nga lëvizja “Vetëvendosje”, ai është pagëzuar me emrin “Damir Fazlliçi i Kosovës”

 

Braçe: Azerbajxhani, i përfshirë

“Essad Puskar, me profile të shumta publike, njofton se javët e fundit ka punuar shumë në Baku-Azerbajxhan për të krijuar mundësi të reja investimesh. Ai ka qenë atje në takime me ministrin e Jashtëm të Azerbajxhanit, por edhe me zv.presidentin e kompanisë shtetërore të naftës ‘Socar’”, deklaroi dje deputeti i PS-së, pak pas zhvillimit të tenderit.

 

Shkurt 2012

Kryeministri ftoi kompaninë “Socar”, aksionere e gazsjellësit TAP

Berisha u kërkoi azerëve të blinin “Albpetrol”-in

Plani i Azerbajxhanit për të blerë “Albpetrol”-in mund të jetë inskenuar kohë më parë, në shkurtin e këtij viti, kur zyrtarisht Kryeministri shqiptar, Sali Berisha, u kërkoi atyre të ishin pjesëmarrës në tenderin e shitjes së 100 për qind të aksioneve.

Është vetë zyra e shtypit të Kryeministrisë që zbardhi një pjesë të takimit që kreu i qeverisë shqiptare pati me homologun e tij, Ilham Aliyev, i zhvilluar në shkurt, në Baku, ku temë diskutimi kryesore ishte projekti i gazsjellësit TAP.

Kryeministri Berisha theksoi se fryma miqësore e marrëdhënieve politike dhe pozicioni gjeopolitik i të dy vendeve janë faktorë themelorë për një bashkëpunim të frytshëm.

“Kryeministri Berisha ftoi kompaninë shtetërore të gazit dhe naftës ‘Socar’ të marrë pjesë në privatizimin e ‘Albpetrol’-it, si dhe në zhvillimin e masterplanit për ngritjen e rrjetit të transmetimit të gazit në Shqipëri”, njoftonte zyra e shtypit në atë kohë. “Socar” zotëron aksione në vendburimin e gazit në Shah Deniz, nga ku pritet të marrë jetë projekti multimiliardësh TAP.

Shitja e “Albpetrol” është privatizimi i fundit strategjik i Shqipërisë. Në kriteret e kualifikimit qeveria ka parashikuar që në rastin e blerësit të vetëm, kompania që do blejë “Albpetrol” duhet të ketë të paktën 5 vjet përvojë në fushën e naftës.

Në rastin e bashkimit të shoqërive, njëra nga kompanitë duhet të jetë strategjike me po 5 vjet eksperiencë dhe duhet të zotërojë të paktën 30 për qind të aksioneve totale të konsorciumit. Po kështu, në kriteret e kualifikimit, është parashikuar që kompania të ketë një kapital të paguar prej rreth 80 milionë dollarësh dhe vlera e saj neto duhet të jetë të paktën 100 milionë dollarë.

Ironikisht, po në shkurt të këtij viti, përmes një vendimi të posaçëm me numër 107, qeveria ka paracaktuar edhe kriteret e vlerësimit për shitjen e “Albpetrol”. Sipas tyre, oferta financiare do të ketë 75 për qind të pikëve, ndërsa garancitë teknike kanë 25 për qind të pikëve.

Shitja e kompanisë “Albpetrol” është privatizimi i fundit strategjik i Shqipërisë

 

Ironia

Po në shkurt të këtij viti, qeveria miraton vendimin për kriteret

 

©Copyright Gazeta SHQIP


Për t'u bërë pjesë e grupit mjafton të klikoni: Join Group dhe kërkesa do t'ju aprovohet.
Komuniteti Gazeta Shqip: https://www.facebook.com/groups/gazetashqip/





LEXO MË TEJ:


Më të lexuarat

4 Comments
  1. Ndoc Sukaj says

    Ne Shqiperine tone ndodhin shume gjera te cuditeshme ,dhe per fat te keq ato perseriten pa mbarim.

  2. xoni says

    Me thoni nje rast kur shteti ka bere dicka te mire per vendin dhe ju e keni lavderuar? Nuk u tha nje fjale mirenjohje per vizat, per rrugen e kombit, per Naton, etj etj…. por vetem u hodh balte e u nxi realiteti. Edhe ky rast nuk ben asnje perjashtim ne makinen propagandistike te PS e cila kryesohet nga Top-Media.

  3. Ed says

    Eshte akoma heret per te dhene nje opinion mbi tenderin e hapur te shitjes se Albpetrol. Personazhet e permendura ne kete shkrim jane xhonglere te investimeve. Kjo nuk eshte e ndaluar me asnje ligj ne bote, perderi sa nuk shkelen ligjet! Shuma shume e larte e paraqitur si oferte, kuptohet qarte qe eshte ne nje emer por pjesmarres jane disa. Secili ka interesat e veta. Po te vazhdojem me tutje, se kush, sa, dhe si, atehere do te humbasim neper kanale bankare. E rendesishme eshte se sa e mundur eshte qe komisioni i tenderimit mundet te provoje indikatoret e paraqitura nga ofertedhenesit.
    Sipas shikimit te primar, duket shume mjegull! Ne fakt eshte kompania ofertedhenese e detyruar te qartesoje dhe te beje sa me transparente dhe besimplote oferten e saje. Perndryshe tenderimi nuk arrin qellimin. Deri tani ka vetem spekullime nga opinioni.

  4. skrapalliu says

    Mire e ke o xeni, po miku im, po vizat dhe NATO jane nje rruge e tere reformash qe u bene pa arritem aty. e sa per rrugen e Kombit qe na kushtoi 1.2 miliard $ nese ke kaluar mbi te dhe e ke pare, po shkaterrohet dita-dites. Shiko rrugen e bere ne Kosove e cila per nga standartet as qe nuk krahasohet me te tonen. O xeni, o byrazer, shiko sistemin shendetesor ku eshte katandisur ku te therret qameti ( te uroje te mos semuresh kurre, pasi si te kesh lek, si jo jeten e ke ne rrezik). Shiko arsimin. A e di ti cilat jane kriteret e vendosura per punesim? Nuk e di. Ti them une. Lek ose euro nga 3000 deri ne 5000 euro, Ministri ne telefon, Partia ( ne Fier e ka lsi), dhe nderi per vajzat e reja dhe jo ( shko ne shtrat sa here ta kerkoje shefi dhe nuk te jep vendim).
    Apo te shkruaj per ekonomine. Ore nuk ka pare Shqiperia ne 100 vjet pavaresi TRADHETARE qe shesin vendit e tyre sikur ta kene asgje, pavlere. Keta nuk kane gjak shqiptari. Do te them se si natyra ketu po shperfytyrohet. Mjere ne qe jetojme ketu. Edhe ti o xeni nese jeton ketu ( edhe pse mund dhe te uroj te mos kesh probleme ekonimike, pasi dhe ti shqiptare si une je, por ama) thithim ajrin e ndotur, hame ushqime qe nuk dihet me se jane. Mund te fjas shume dhe keshtu te bezdis.
    Sinqerish une nuk di se si do te jene te tjeret qe do te qeverisin vendin, por ama di te them me bindje te plote dhe i vendosur qe kjo eshte situata me e keqe qe po jeton vendi YNE ne keto 100 vjet O XENI dhe FAJ per kete kane ata qe na qeverisin. Per te mira dhe respekt.

Comments are closed.