Raporti, qeveria shqiptare merr borxh për pagat dhe pensionet

Treguesit

Pas monitorimit, “Mjaft!” zbardh lëvizjet e buxhetit për vitin 2011

Më shumë si ndërhyrje politike, se sa nga paaftësia për të parashikuar, buxheti i shtetit për vitin 2011 ndryshoi tre herë, me korrigjime, duke iu përafruar realitetit ekonomik, por sërish në fund të vitit rezultoi me bilanc negativ.

Sikurse bën publike në raportin e fundit të monitorimit, lëvizja “Mjaft!” nxjerr në pah punën e dobët të ministrive për të menaxhuar si duhet paratë e taksapaguesve shqiptarë. Një nga hartuesit e raportit, Gjergj Erebara, konstaton disa gjetje sa i takon ecurisë së të ardhurave dhe shpenzimeve, ku bie në sy mungesa e fondeve nga burimet e shtetit për paguar rrogat e punonjësve dhe të pensionistëve.

Edhe gjatë vitit 2011, ashtu si në 2009 dhe 2010, qeveria planifikoi dhe ekzekutoi rritjen e pagave të administratës publike, gjë që u detyrua ta mbulojë pjesërisht me rritje të borxhit publik, pasi norma e rritjes së të ardhurave të buxhetit nuk e justifikonte këtë rritje. Shpenzimet për personelin u rritën me 2.6 për qind, ndërkohë që të ardhurat totale të buxhetit u rritën me vetëm 1.1 për qind.

Përfundimisht, mund të thuhet se për periudhën 2008-2011, të ardhurat e buxhetit të shtetit janë rritur mesatarisht me 4.2 për qind, ndërsa paga mesatare në sektorin publik është rritur me 8.2 për qind.

Siç dallohet edhe nga grafiku, rritja e pagave gjatë dekadës së fundit nuk ka ndjekur ecurinë e rritjes së të ardhurave buxhetore dhe kjo është veçanërisht domethënëse për vitet 2009 dhe 2011, pra vitet e zgjedhjeve. Qeverisë i sugjerohet vendosja e një rregulli të përgjithshëm në politikën e rritjes së pagave në raport me rritjen e të ardhurave buxhetore. E logjikshme është që ritmi i rritjes së pagave të sektorit publik të jetë më i ulët se sa ritmi i rritjes së të ardhurave, ku raporti është i diskutueshëm. Një politikë e kujdesshme pro uljes së deficitit buxhetor dhe stokut të borxhit publik, rrjedhimisht, rritjes së suficitit primar të buxhetit, mund të jetë rritja e pagave sa 50 për qind e rritjes së të ardhurave ndërsa një politikë prokonsum mund të jetë rritja e pagave me të njëjtin ritëm me rritjen e të ardhurave. Duke pasur parasysh nevojën për të ulur borxhin publik, e logjikshme është rritja e pagave me gjysmën e ritmit të rritjes së të ardhurave.

“Monitorimi Publik i Ministrive 2011”, është raporti i tretë, i publikuar si rezultat i një pune intensive kërkimore prej skuadrës “Unë Votoj”, nismë kjo që daton në muajin janar të vitit 2008.

 

 

 

©Copyright Gazeta SHQIP


Për t'u bërë pjesë e grupit mjafton të klikoni: Join Group dhe kërkesa do t'ju aprovohet.
Komuniteti Gazeta Shqip: https://www.facebook.com/groups/gazetashqip/





LEXO MË TEJ:


Më të lexuarat

Comments are closed.