Lista e barnave me rimbursim rrezikon bllokimin

Zhvlerësimi i lekut, projektbuxheti për vitin 2010 parashikon 382 milionë lekë për barnat

Lorina Mixha

Rritja e çmimit të euros dhe zhvlerësimi i lekut në tregun e këmbimit valutor ka shqetësuar importuesit e ilaçeve.

Pak kohë më parë ata kanë biseduar me ministrin e Shëndetësisë që do i jepej zgjidhje problemit të fitimeve të tyre, duke qenë se ilaçet e listës së barnave me rimbursim blihen me euro apo dollar dhe llogaritjet për rastin e grosistëve nuk bëhen sipas kursit aktual të këmbimit valutor. Është rënë dakord që do të merret parasysh për çdo përllogaritje, kursi i këmbimit të valutës sipas raportit të Bankës së Shqipërisë me 132 lekë për 1 euro, të dhënat e gjashtëmujorit të fundit. Kjo masë është vendosur sipas parashikimit të Ministrisë së Financave. Ndërkohë që importuesit e ilaçeve nuk bien dakord që përllogaritjet për ilaçet të bëhen sipas kursit me 132 lekë. Në rast se nuk do të shtohet fondi për efektin e ndryshimeve të çmimeve dhe kursit të këmbimit, atëherë grosistët do të refuzojnë të lidhin kontratat me Institutin e Sigurimeve të Kujdesit Shëndetësor, për listën e barnave me rimbursim, e cila duhet të jetë gati deri në fillim të muajit dhjetor.

Kjo do të thotë se rrezikojnë të mbeten pa ilaçe pensionistët, kategoritë e pacientëve që vuajnë nga sëmundje kronike apo nga sëmundje të veçanta.

Grosistët

"Kemi 9 muaj që shesim me ulje, për ilaçet deri tani kursi i këmbimit është llogaritur me 123 lekë për 1 euro. Pak ditë më parë kemi pasur një takim me autoritetet shëndetësore dhe ne si kryesi kemi bërë prezent që minimumi i kursit të llogaritet me 136, 137 lekë", tha Kastriot Zotaj, kreu i Shoqatës së Grosistëve. Sipas tij, në rast se nuk do të merren parasysh kërkesat e tyre, atëherë grosistët do të refuzojnë lidhjen e kontratave me Institutin e Sigurimeve të Kujdesit Shëndetësor.

"Në rast se do të llogaritet me 132 lekë ne nuk do ta firmosim kontratën për 2010-n dhe tregu do të mbetet bosh. Një shtet ka vetëm një kurs këmbimi, ne kemi kursin e doganës. Kursi që na vënë në rimbursim është tjetër me kursin e zhdoganimit, ne me këtë kurs tatohemi. I blejmë me 138, 139 dhe në Qendrën e Kontrollit të Barnave kur vijnë llogariten me 123. I kemi paraqitur propozimet, ndërkohë që kemi biseduar edhe me ministrin", sqaroi Zotaj. Sipas tij, që me rritjen e çmimit të euros në tregun e valutës dhe mosgjetja e zgjidhjes për çështjen e tregtimit të barnave ka shkaktuar probleme me financat e grosistëve, të cilët nëse nuk gjejnë zgjidhje për vitin 2010 do të refuzojnë të sjellin barna në vend.

Projektbuxheti

Sipas projektbuxhetit të vitit 2010, shpenzimet për vitin 2010 janë parashikuar të balancuara me të ardhurat, pra 25949 milionë lekë ose 7.18 për qind më shumë se plani i vitit 2009, si dhe e barabartë me tavanet e përcaktuara nga Ministria e Financave.

"Shpenzimet e rimbursimit të barnave për vitin 2010 të arrijnë në rreth 20.55 për qind të totalit të shpenzimeve të ISKSH-së për vitin 2010. Në këto përllogaritje janë marrë parasysh: efekti i ndryshimeve të çmimeve për vitin 2010 dhe kursi i këmbimit me rreth 382 milionë lekë", thuhet në projektbuxhet. Sipas parashikimeve të Ministrisë së Financave, efekti financiar nga zgjerimi i listës së barnave të rimbursueshme, si dhe faktorë të tjerë duhet të merren në konsideratë në planifikimin e shpenzimeve të rimbursimit.