Apeli fal Ndreun, ulen 5 javë pezullim

Trajneri

Tashmë është shndërruar në një procedurë të zakontë: Komisioni i Disiplinës "kryqëzon" aktorët e futbollit për gjestet anti-sportive, ndërsa Apeli i fal, duke i reduktuar në mënyrë të ndjeshme ndëshkimet. Kjo ka ndodhur edhe gjatë së premtes, kur ky organ ka ulur pezullimin e trajnerit të Kastriotit, Ramazan Ndreu. Nga dhjetë javë larg fushave të lojës, sipas masës së përcaktuar dhjetë ditë më parë, tashmë drejtuesi i stolit krutan do të qëndrojë vetëm pesë ndeshje. "Pasi shqyrtoi ankimimin e trajnerit të Kastriotit, Ramazan Ndreu, Apeli vendosi të ndryshojë vendimin e datës 21 tetor, duke e dënuar përfundimisht me pesë ndeshje pezullim, ndërsa gjoba (50 mijë lekë të reja) lihet në fuqi". Trajneri u pezullua për shkelje të etikës dhe gjeste anti-sportive, pasi gjatë takimit Kastrioti-Skënderbeu, shtyu mbrojtësin kroat të korçarëve, Djarmanti.

e. k.