Kosovë-Serbi, më 5 nëntor përballë FIFA-s

Takimi

Kosova vazhdon të bëjë hapa përpara rreth njohjes në arenën ndërkombëtare, e cila do t‘i hapte rrugë edhe krijimit të një përfaqësuese futbollit. Të premten, zyra e presidentit të FIFA-s, Sep Blater, ka dërguar një njoftim në Federatën Kosovare të Futbollit (FFK), ku konfirmohej takimi ndërmjet "qeverisë" së futbollit dhe drejtuesve të federatës kosovare dhe asaj serbe. Ky diskutim trepalësh do të zhvillohet më 5 nëntor në selinë e FIFA-s, në qytetin zviceran Zyrih, në orën 15:00. Në mbledhje do të jenë të pranishëm presidenti Blater, zv/presidenti Geof Tompson, që njëkohësisht është edhe kreu i Komitetit të Federatave, sekretari i përgjithshëm i FIFA-s, Zherom Valke, dhe drejtori i çështjeve ligjore, Marko Vilixher. Por, edhe pse FIFA e FFK janë të gatshme për këtë takim, një gjë e tillë nuk mund të thuhet për palët serbe, e cila vazhdon të mos e komentojë ftesën.

e. k.