Cana: E ardhmja ime te Marseja është 50-50

Largimi i mesfushorit të Kombëtares shqiptare, Lorik Cana, nga Olimpiku i Marsejës në fund të këtij sezoni është shumë i mundshëm. Një gjë të tillë e ka konfirmuar vetë kapiteni i skuadrës franceze në një prononcim për sportiven "Aujourd‘hui Sport". 25-vjeçari ka deklaruar se shanset e tij për të qëndruar te Marseja edhe në sezonin e ardhshëm janë 50 me 50. "Ka mundësi të largohem, edhe pse kam kontratë të vlefshme deri në vitin 2012. Do të bisedoj me familjen dhe drejtuesit e klubit të Marsejës në fund të këtij edicioni. Dera është e hapur, por të gjithë dhe nëse do dua të largohem, askush, nuk do ta pengojë një gjë të tillë, por do ta respektojnë vendimin tim", ka thënë kapiteni i Marsejës, Cana, për mediat franceze. "Ndoshta nuk do të largohem menjëherë, por karrierën nuk do ta mbyll këtu, edhe pse kam shumë kohë me skuadrën. Nuk e kam me nxitim largimin, pasi kam dëshirë të fitoj diçka me Marsejën para se të largohem. Sot gjasat për t‘u larguar nga këtu jam 50 me 50", u ka thënë marsejezëve. Mesfushori kuqezi edhe njëherë nuk e ka fshehur dëshirën e tij të madhe për të luajtur në Premier Ligë apo Bundesligë. Ai ka pasur oferta nga Liverpuli, Evertoni, Arsenali, Bajerni i Mynihut dhe Hamburgu. "Anglia dhe Gjermania më tërheqin shumë. Në Bundesligë shpesh është përmendur emrin i Bajernit, por nuk ka ende asgjë konkrete", ka theksuar Cana. Ai luan te Marseja që nga korriku i vitit 2005, kur u transferua nga skuadra e PSG-së për dëmshpërblim prej katër milionë eurosh. Sot kartoni i tij kap vlerën e 14 milionë eurove. Cana ka regjistruar 118 paraqitje me fanellën e kësaj skuadre dhe ka shënuar 16 gola. Skuadrën e Marsejës sezonin e ardhshëm do ta drejtojë trajneri francez, Didier Deshamp, që synon ta mbajë shqiptarin në ekip. Megjithatë, kjo duket se do të jetë një nismë e vështirë për të, pasi Cana, i zhgënjyer nga humbja e titullit, mund të zgjedhë të vazhdojë karrierën në një tjetër klub të madh evropian.