Kuzhe nis nga puna për anti-Portugalinë

Sot, konsultime me FSHF-në për programin e Kombëtares

Altin Manallari

Emocionet e kampionatit përgatitet pak nga pak t‘i lënë vendin atyre të impenjimeve të Kombëtares sonë, e cila pas rreth dy javësh (më 6 qershor do të duhet të zbresë në fushën e stadiumit "Qemal Stafa" për t‘u ndeshur me "Brazilin" e Evropës, Portugalinë. Janë pjekur kushtet tashmë. Shqipëria e ka trajnerin e saj që prej të martës së kaluar, i cili prej 48 orësh ka zbarkuar në kryeqytet në përmbushje të misionit të tij të ri në krye të kombëtares kuqezi. Josip Kuzhe, të shtunën në mbrëmje është shfaqur në tribunën VIP të "Qemal Stafës", për të ndjekur për herë të parë me vëmendje një ndeshje të kampionatit shqiptar, atë të "finales sezonale" mes Tiranës dhe Vllaznisë. Një takim i shumë pritur nga të gjithë, por që do të mund t‘i shërbente edhe trajnerit të ri të përfaqësues për të evidentuar ndonjë element të vlefshëm për Kombëtaren e tij. "Ishte një ndeshje shumë e bukur dhe mund të them se Tirana e meritoi këtë fitore". Këto ishin fjalët e pakta të Kuzhesë për ndeshjen e cila u fitua 2-1 nga bardheblutë, por ai nuk preferoi të evidentojë momente të veçanta apo emra të veçantë lojtarësh. Megjithatë, mendon se zyrtarisht do ta nisë punën vetëm sot, kur edhe do të ulet rreth një tavoline me drejtuesit e FSHF-së për të përcaktuar procedurat e para të programit të Shqipërisë anti-Portugali. "Për sa i përket detyrës si trajner i kombëtares, mendoj se do të fillojmë zyrtarisht ditën e hënë (sot), kur do të nis diskutimet me drejtuesit e FSHF-së për të përcaktuar datën e grumbullimit për ndeshjen e radhës ndaj Portugalisë", pohon tekniku kroat, i cili pritet të kërkojë një grumbullim sa të shpejtë të skuadrës, gjë që do t‘i shërbente për të krijuar një ide sa më të qartë rreth potencialit të përfaqësueses. Në javën e fundit ai thekson se ka marrë shumë informata për lojtarët shqiptarë që luajnë në kampionatin vendas, por edhe ata që aktivizohen në kampionatet e huaja. Është i ndërgjegjshëm për vështirësitë e ndeshjeve të mbetura në grupin 1 të eliminatoreve të Botërorit 2010, dhe shpreh keqardhjen për daljen e Shqipërisë jashtë objektivit. "Na presin tri ndeshje të vështira për eliminatoret e Botërorit 2010 në grupin 1. Sigurisht, nuk më vjen mirë që nuk kemi shumë pikë dhe nuk jemi në lojë për kualifikim", sqaron Kuzhe. Por ai e di se këto sfida do të duhet t‘i shfrytëzojë më së miri për të nderuar Kombëtaren e të ardhmes, të cilës do t‘i besohen objektivat për eliminatoret e Euro 2012. "Këto do të jenë ndeshje të rëndësishme dhe ne duhet të bëjmë paraqitje të mira, për të qenë në gjendje të formojmë një skuadër të mirë për eliminatoret e Evropianit të ardhshëm", përfundon trajneri kroat i Shqipërisë, që gjatë gjithë ditës së djeshme ka qëndruar në hotel "Rogner", duke studiuar materialet filmike të vëna në dispozicion nga FSHF.