BB: Kriza prek Shqipërinë në disa sektorë

Raporti i "Perspektivës Ekonomike Globale 2009" paralajmëron rreziqet e së ardhmes

Vendet në zhvillim, ku bën pjesë edhe Shqipëria, do të jenë më të prekurat nga kriza botërore, pasojat e së cilës do të ndihen më shumë në 2009-ën. Sipas "Perspektivës Ekonomike Globale" (PEG) 2009, botuar dje nga ekspertët e Bankës Botërore, ekonomia globale po kalon një tranzicion nga një periudhë afatgjatë rritjeje, të kryesuar nga vendet në zhvillim, në një periudh ë të madhe pasigurie, ndërsa kriza financiare në vendet e zhvilluara ka tronditur tregjet kudo në botë. Ne vijim, PEG 2009 paralajmëron se rritja botërore e GDP-së do të jetë në nivelet 2.5 për qind në vitin 2008 dhe në 0.9 për qind për vitin 2009. Vendet në zhvillim do të shënojnë një rritje në 4.5 për qind vitin tjetër, çka dëshmon një rënie kundrejt 7.9 për qind të arritur në vitin 2007. Në anën tjetër, kjo rritje pritet të jetë negative edhe në vendet me të ardhura të larta. "Njerëzve në vendet në zhvillim do t‘iu duhet të përballen me dy goditje të mëdha të importuara nga jashtë-rritja marramendëse në çmimet e ushqimit dhe karburanteve, e pasuar kjo nga kriza financiare - e cila ka minimizuar tensionet në tregjet e mallrave, por që po teston efektivitetin e sistemeve bankare dhe po kërcënon një numër të konsiderueshëm njerëzish me humbjen e vendeve të punës kudo në botë", citohet të ketë thënë Justin Lin, ekonomist i Lartë pranë BB dhe zv/president i Ekonomisë së Zhvillimit. "Masa urgjente duhet të ndërmerren për të parandaluar efektet negative të krizës në ekonomitë reale dhe te shtresat e varfra, përfshirë edhe vënien në jetë të projekteve publike në ndërtimin e rrugëve, hekurudhave, shkollave dhe sistemeve të kujdesit shëndetësor", shtoi Lin. Duke u ndalur te parashikimi i bërë për vendet si Shqipëria, raporti i BB-së thotë se, në momentin kur volumi tregtar botëror pritet të tkurret afërsisht 2.1 për qind në vitin 2009, vendet në zhvillim do të përjetojnë rënie të konsiderueshme në nivelin e eksporteve. Kushtet me shtrënguese të kreditimit dhe pasiguria në rritje, pritet të shohin ngadalësimin e rritjes së investimeve si në vendet në zhvillim, ashtu edhe në vendet e pasura dhe të zhvilluara në vitin 2009, të cilat do të bien në 1.3 për qind për vendet e zhvilluara dhe do të rriten vetëm me 3.5 për qind në vendet në zhvillim përkundrejt shifrës 13 për qind në vitin 2007.



Vendet në zhvillim do të shënojnë një rritje në 4.5 për qind vitin tjetër, çka dëshmon një rënie kundrejt 7.9 për qind të arritur në vitin 2007