Zhduket familja e Ilir Kumbaros në Shqipëri

Prokuroria: Nga verifikimet rezultoi se edhe i vëllai i ish-shiksit ndodhet jashtë shtetit

Ekstradimi i Ilir Kumbaros,
i pandehur me akuzat
e rrëmbimit të Remzi
Hoxhës, Ziso Kristopulit
dhe Avdyl Loshajt vihet në rrezik,
pasi në Shqipëri nuk ka asnjë
pjesëtar të familjes. Nga verifikimet
paraprake të Prokurorisë
së Përgjithshme ka rezultuar se
familjarët e Kumbaros janë larguar
në vendet perëndimore.
Por askush nuk ka dijeni për
vendndodhjen e saktë të tyre.
Familja e tij prej vitesh jetonte në
qytetin e Rrogozhinës. Mësohet
se Kumbaro kishte vetëm një
vëlla. Nga të dhënat ka rezultuar
se edhe ai është larguar jashtë
Shqipërisë. Por fqinjët e tij nuk
u kanë dhënë detaje oficerëve
të policisë, për shtetin ku mund
të ndodhet. Duket se e vetmja
provë e organit të akuzës për të
vërtetuar identitetin e tij është një
fotografi, pra as shenja gishtash
dhe analiza të ADN-së të bëra
me të afërmit. Por prokuroria
mund të përdorë edhe një citim
të të ndjerit Bashkim Gazidede,
sipas të cilit "Ilir Kumbaron e kam
njohur kur më ka kërkuar lirim
nga puna në vitin 1996. Nuk e di
se çfarë pune ka bërë, por më ka
thënë se do ikte në Angli dhe unë
e kam liruar".
Mësohet se Prokuroria Shqiptare
nuk ka dërguar asnjë gjurmë
apo provë që të vërtetojë se personi
i arrestuar disa javë më parë në
Angli, i vetëquajturi Shaqa Shatri,
është Ilir Kumbaro. Në Drejtorinë
e SHIK-ut në Tiranë apo në zyrat e
regjistrit të gjendjes civile nuk ka
asnjë "dosje" me prova që mund
të përdoren për njohjen e tij, në
gjykatën londineze. Madje, prova
e vetme e drejtësisë shqiptare
është vetëm një foto e disa viteve
më parë, ku transformimi i tij,
për togat e zeza në Angli, mund
të hedhë poshtë gjithçka. Burime
zyrtare nga akuza qendrore thanë
dje se kanë përpiluar dosjen me
kërkesën për ekstradim të Ilir
Kumbaros në Shqipëri. Provat e
akuzës shqiptare janë dëshmitë
e personave të rrëmbyer nga
SHIK-u në vitin 1995, por ato nuk
mund të përcaktojnë se personi i
arrestuar në Angli është i akuzuari.
Hetuesit i kanë depozituar një
kërkesë SHIK-ut për gjurmë gishtash
të tij nëpër dokumentet që
ka "kaluar nëpër dorë", në kohën
që ka qenë drejtues për Tiranën.
Por, përgjigjja ka qenë e prerë:
nuk ka asnjë provë apo gjurmë të
Ilir Kumbaros në dosjen e tij, gjatë
kohës që ka punuar. Madje, ka
informacione se të gjitha shenjat
janë zhdukur nga ish-zyrtarët e
Shërbimit Inteligjent Shqiptar.
Zyrtarisht, Prokuroria e Përgjithshme
Shqiptare tha dje se të
vetmet prova, që janë nisur për
njohjen e Kumbaros në Angli, janë
dëshmitë e bashkëpunëtorëve të
tij të ngushtë dhe një foto e realizuar
vite më parë. Por, ajo çfarë
kërkonte drejtësia angleze është:
çfarë ka të përbashkët personi
i vetëquajtur Shaqa Shatri dhe
Ilir Kumbaro? A ka elementë të
përbashkët të arrestuarit në Angli
me ish-zyrtarin e lartë të SHIKut
shqiptar? Ku ka banuar dhe a
rezulton i regjistruar në ndonjë
gjendje civile? Po gjurmë gishtash
dhe nga sa pjesëtarë përbëhet
familja e tij? Vetëm disa ditë më
parë akuza i është përgjigjur
drejtësisë angleze se nga krahasimi
i fotografive rezulton se është i
njëjti person dhe se Kumbaro ka
banuar në qytetin e Rrogozhinës
dhe më pas në Tiranë. Por drejtësia
shqiptare nuk ka mundur
të kthejë një përgjigje se nga sa
pjesëtarë përbëhet familja e tij,
pasi të gjithë të afërmit ndodhen
jashtë Shqipërisë, të emigruar që
në vitin 1996.