Shpronësimet, abuzime me çmimin e tokës

Prefekti i Fierit i shkruan Berishës: Fshatarët që ankohen, kanë të drejtë

Afro 60 familje në Komunën e Levanit, nuk janë shpronësuar ende për autostradën Levan-Vlorë. Përcaktimi i vlerës për tokën që ka prekur gjurma e autostradës ka vonuar procesin e shpronësimit. Lajmi konfirmohet zyrtarisht nga prefekti i Fierit, Shahin Bejdaj, i cili thotë, për gazetën "Shqip", se ankesat e shumta të banorëve të Levanit janë të drejta, pasi vlera e shpronësimit për tokat e vëna në dispozicion nga fermerët nuk i afrohet tregut të sotëm, apo dhe çmimeve të shpronësimeve të tjera të ndodhura për investime të ndryshme publike.

Prefekti i Fierit thotë se, me gjithë vijimin e punimeve në autostradën Levan-Vlorë, sërish një pjesë e fermerëve nuk janë shpronësuar. "Unë jam njohur nga afër me problemin e rreth 60 familjeve në Levan, që nuk pranojnë vlerën e vënë në dispozicion për shpronësim. I jam drejtuar Kryeministrit të vendit me një kërkesë zyrtare dhe të protokolluar. Konkretisht, Kryeministrit Sali Berisha, jo vetëm që i kam bërë prezent shqetësimin e banorëve, por i kam kërkuar ritrajtim të vlerës së shpronësimit", thotë prefekti Bejdaj.

Gjithashtu, prefekti ka treguar se "ekziston një problem me çmimin e shpronësimit. Specialistët e Komunës Levan dhe të institucionit të prefektit kanë shqyrtuar dokumentacionin e çdo fermeri. Ata kanë kryer kontroll në terren dhe ka rezultuar që për një parcelë toke bujqësore, brenda të njëjtës sipërfaqe, të ketë çmime të ndryshme shpronësimi. Ka mjaft raste që brenda një parcele çmimi i shpronësimit për një pjesë të jetë 16000 lekë të rinj për metër katror, ndërsa për një pjesë tjetër çmimi i shpronësimit të shkojë deri edhe në 4000 lekë të rinj për metër katror. Ky është problemi i shumë fermerëve të Levanit, të cilët ende nuk janë shpronësuar. Ky problem më ka detyruar mua, si prefekt, që të mbështesë kërkesën e banorëve të prekur nga gjurma e autostradës dhe t‘i drejtohem Kryeministrit të vendit, nga i cili shpresoj shumë".

Sipas Bejdajt, i njëjti problem ekziston edhe me një pjesë të fermerëve të komunës fqinje, Novoselë, që i përket Rrethit të Vlorës. Por, edhe pse ka mjaft banorë në këtë komunë të pa shpronësuar, çmimi që është aplikuar për një metër katror, sipas prefektit të Fierit, është shumë herë më i lartë se ai i Fierit. Çmimi shkon në 22000 lekë për metër katror.

Të 60 familjet e Komunës Levan kanë kërcënuar dhe kanë lajmëruar edhe prefektin e Fierit që do të hidhen në protesta.

Kundërshtim për vlerën e shpronësimit regjistrojnë edhe fermerët e Komunës Frakull, në rrethin e Fierit, të cilët preken nga dega tjetër e autostradës, pikërisht nga ajo Levan-Tepelenë. Në këtë komunë, mbi 800 fermerë kanë në dispozicion për tokat që do të lëshojnë për autostradën Levan-Vlorë çmime të tilla që variojnë nga 3700 deri në 9100 lekë për metër katror. Inxhinierja e komunës dhe topografi tregojnë për gazetën se toka e komunës Frakull, që preket nga autostrada Levan-Tepelenë, është e gjitha tokë bujqësore e kategorisë së parë, ndërkohë që çmimi për një pjesë të saj është caktuar sikur të ishte tokë joprodhuese. Edhe çmimi maksimal për një pjesë të fermerëve të kësaj komune është shumë larg çmimit të tregut të sotëm, si dhe larg çmimeve të aplikuara deri tani. Me gjithë afishimin e çmimeve të shpronësimit në Fletoren Zyrtare, fermerët dhe drejtuesit e Komunës Frakull kanë kërkuar ndërhyrje të qeverisë për rivlerësim të tokës.