Kapet "kasapi" i bandës së Altin Dardhës

Policia arreston për vjedhje Ilir Ponoçin, por deklaron se është i dyshuar për krime makabre

Një tjetër anëtar i bandës famëkeqe të Altin Dardhës, ka rënë në prangat e Policisë së Beratit. Drejtoria e Policisë së Qarkut Berat bëri të ditur se shërbimet e Komisariatit të Beratit kanë arrestuar shtetasin Ilir Çuman Ponoçi, 37 vjeç, banues në lagjen "Çlirimi" të qytetit. Në fakt, ndalimi i tij është bërë pasi është autor i vjedhjes së lokalit të shtetasit Arjan Kanani, por policia deklaron se ky person dyshohet si autor i disa krimeve tepër të rënda të ndodhura në Berat, në vitin 1997. Burime të brendshme të Policisë së Beratit bëjnë të ditur se Ponoçi ka qenë një nga pjesëtarët më të rrezikshëm të bandës së lagjes "Çelepias", që drejtohej nga Altin Dardha. Sipas burimeve policore, në dosjen e tij janë renditur një numër i madh krimesh të rënda të ndodhura gjatë vitit 1997. Ndër këto krime përfshihen që nga grabitjet me armë, gjobëvëniet, rrëmbimet e personave e deri te vrasjet makabre. Ponoçi njihej në vitin 1997 si "i tmerrshmi" i bandës famëkeqe, pikërisht në atë kohë kur gjysma e qytetit nga hyrja e Beratit e deri tek Ura e Goricës u izolua nga banda e Altin Dardhës. Gjithsesi, burimet policore pohojnë se ende duhen mbledhur prova dhe informacione për të vërtetuar akuzat e rënda që bien mbi këtë person dhe kjo do të bëhet në saj të bashkëpunimit edhe me komunitetin. Drejtori i Policisë së Qarkut Berat, Bernard Caushaj, thotë se policia do të hetojë për të gjitha vrasjet që ka kryer kjo bandë, që nuk ka kursyer edhe foshnjat, gratë dhe pleqtë. Nga informacionet e deritanishme, policia ka arritur të zbulojë se Ponoçi kishte një rol të rëndësishëm në bandën kriminale, mbi të cilën rëndojnë dhjetëra vrasje. Ponoçi përdorej nga Altin Dardha për të torturuar pengjet dhe për të ekzekutuar personat që kundërshtonin bandën.

"Gjithsesi, kjo është vetëm maja e ajsbergut", thotë kreu i policisë së Beratit, pasi, sipas tij, do të ketë të tjera arrestime të bujshme të anëtarëve të bandës më të egër të vitit të mbrapshtë. Disa ditë më parë, policia e Beratit arrestoi një tjetër të dyshuar si anëtar të bandës së "Çelepiasit", Artan Taren. Edhe ky i fundit u arrestua për krime që nuk kanë lidhje me aktivitetin e bandës, por policia deklaroi se është person nën hetim për krimet e vitit 1997 dhe se shumë shpejt do të përgjigjet edhe për këto.

Vënia përpara drejtësisë e anëtarëve të mbetur gjallë të bandave famëkeqe të vitit 1997 është prioritet i punës së policisë së Beratit. Në fund të muajit shtator, pak ditë pas emërimit të tij në krye të Drejtorisë së Policisë së Beratit, Bernard Caushaj tha, në një prononcim për gazetën "Shqip", se zbulimi i krimeve të vjetra do të ishte në qendër të vëmendjes së punës së tij. Sipas Caushajt, vendosja e drejtësisë për krimet e vjetra do të rikthente besimin e popullit te Policia e Shtetit. "Ajo periudhë e zezë nuk mund të shlyhet lehtë nga memoria e këtij qyteti, ku mbi 500 djem e vajza u vranë dhe u masakruan, dhe ende sot e kësaj dite, nënat e veshura me të zeza presin drejtësi", tha Caushaj. Janë 106 dosje ngjarjesh të vjetra pa autor, që presin të shpluhurosen nga Policia e Beratit. Megjithëse qytetarët i njohin kriminelët e vitit të mbrapshtë, ata mbeten të pandëshkuar dhe shëtisin të lirë, madje po shtojnë pasurinë e fituar me grykën e armës 11 vjet më parë. Drejtues Bernard Caushaj tha se ishin përzgjedhur dosjet e para për rihetim dhe se bëhej fjalë për vrasje, përdhunime, pengmarrje dhe vënie gjobash, që ende janë të pazbuluara. Caushaj e vuri theksin te krimet e bandës së lagjes "Çelepias", në krye të së cilës ka qenë i famshmi Altin Dardha, i cili nuk jeton më.


Bandat


Ish-të burgosurit

që terrorizuan Beratin


Bandat e Beratit përbëheshin kryesisht nga ish-të burgosur për vrasje e trafiqe, të gjithë të arrestuar pas operacionit të bujshëm të vitit 1996. Gjatë trazirave të vitit 1997, të gjithë ish-të burgosurit u kthyen në Berat për t‘u "hakmarrë", duke krijuar dy banda kryesore, që e ndan qytetin në dy pjesë, njëra me qendër në lagjen "Vakëf" dhe tjetra në "Çelepias". Grabitjet me armë, gjobat, vrasjet e atyre muajve nuk fshihen kollaj nga memoria e qytetarëve të Beratit. Këto banda operonin në fshatra e nga muaji maj dhe brenda në qytetin e Beratit gjithçka ishte nën kontrollin e tyre. Banditët grabisnin fillimisht me maska, por më pas edhe zbuluar dhe filluan të vinin gjoba, madje e të merrnin pengje. Në krye të bandës së "Çelepiasit", lagje në hyrje të Beratit, ka qenë Altin Dardha. Disa nga anëtarët më të egër të kësaj bande kanë qenë vëllezërit Ponoçi, të cilët kanë kryer krime nga më monstruoze. Kjo bandë nuk ka ngurruar të vrasë nëna me foshnja në bark, apo të murosë e betonoj të gjallë të rinj e pleq. Kanë qenë me dhjetëra dhe nga më të ndryshmet krimet e kryera nga anëtarët e kësaj bande. Megjithëse një pjesë e bandës u eliminua nga konfliktet me bandat rivale, ende ka anëtarë të saj, të cilët rrojnë të qetë.