Dëshmi tronditëse në gjyq: Torturat me thika e pinca

Pedofilia, një 12-vjeçar rrëfen mizoritë në qendrën e anglezit Devid Braun

"Jani dhe Dino me kapnin mishin me pinca, dhe më qëllonin me thika dhe pirunë". Ky rrëfim tronditës është regjistruar dje në Gjykatën e Tiranës, në procesin ndaj pedofilëve me nënshtetësi angleze, të cilët, sipas akuzës, e kanë ushtruar veprimtarinë në qendrën bamirëse "Fëmijët e Tij". Dje, një 12-vjeçar, i cili dyshohet të jetë abuzuar seksualisht para tre viteve në qendrën tashmë famëkeqe në kryeqytet, ka dëshmuar përmes një video-konference para gjykatës së Tiranës kundër dy të pandehurve, Robin Arnold dhe Dino Kristodulu, të dy shtetas britanikë. Përveç dy të pandehurve që ndodhen në qeli, i mituri ka akuzuar edhe ish-kuzhinierin e qendrës bamirëse, Janaq Papleka, që sipas tij e dhunonte fizikisht dhe e godiste shpesh me sende të fora. Ish-punonjësi Papleka ka fituar lirinë pak muaj më parë, gjatë procesit paralel që po zhvillohet për skandalin seksual. Ai akuzohej për moskallëzim krimi dhe përpjekje të fshehjes për zbulimin e të vërtetës. "Jani dhe Dino me qëllonin me pinca, thika dhe pirun", tha i përlotur i mituri, i cili gjatë kohës kur keqtrajtohej kishte qenë vetëm 9 vjeç. Pikërisht në këtë pikë gjyqtarja Shefkie Demiraj ka kërkuar ndërprerjen e seancës, pasi i mituri nuk mund të rrëfehej më tej për shkak të gjendjes depresive dhe frikës që shfaqi, edhe pse intervista bëhej në një zyrë tjetër dhe fytyra ishte e kriptuar. Fëmija është personi i parë që sjell dëshminë e detajuar dhe me fakte konkrete, ndaj dy anglezëve të akuzuar për kryerje të marrëdhënieve seksuale me të mitur. Ndërkaq, për të njëjtën çështje gjyqësore ndaj ish-administratorit të qendrës bamirëse "Fëmijët e Tij", John Devid Braun, procesi po shkon drejt fundit.


Braun

I pandehuri Braun është përballur me dëshmi të shumta, jo vetëm të fëmijëve të abuzuar fizikisht dhe seksualisht, por edhe të familjarëve të tyre që i kishin besuar fëmijët tek ai. Në një seancë më parë, ka dëshmuar një nga dëshmitarët më të rëndësishëm dhe pikërisht drejtori i klinikës mjekësore ABC, Guy Eshelman. Në këtë klinikë janë vizituar herë pas here gjatë viteve të fundit të miturit që mbaheshin në qendrën "Fëmijët e Tij". Është sërish kjo klinikë që ka nxjerrë edhe raportin e parë të impotencës për Braun.

"Përveç problemeve shëndetësore, në klinikën tonë janë sjellë edhe fëmijë që shfaqnin probleme me sjelljen dhe probleme fizike të shkaktuara nga abuzimi seksual", ka deklaruar Eshelman këtë herë ndryshe nga çka deklaruar në dëshminë e parë. Sipas mjekut anglez, gjithsej kanë qenë 12 fëmijë, te të cilët ishin konstatuar abuzime seksuale. Gjithsesi, ai ka marrë në mbrojtje britanikun 51-vjeçar, duke deklaruar se ai sillej mirë me fëmijët, të cilët i vishte, i ushqente dhe kujdesej për ta. Po ashtu, mjeku Eshelman ka thënë përpara togave të zeza se edhe fëmijët e ekzaminuar në këtë klinikë ishin sjellë aty pas kontakteve që Braun kishte pasur me stafin e klinikës. Madje, ky i fundit i kishte çuar vetë fëmijët për kontroll mjekësor. Në vijim të fjalës së tij, mjeku anglez ka treguar procesin e vizitave mjekësore që u bëheshin fëmijëve. Prokuroria ka kundërshtuar dëshminë dhe raportin e klinikës për impotencën e Braun. Sipas akuzës, referuar ekzaminimeve të kryera nga mjekët shqiptarë i pandehuri vuan nga sëmundja e fimozës (sëmundje që vështirëson kryerjen e marrëdhënieve seksuale), e cila gjithsesi nuk e pengon atë të kryejë marrëdhënie seksuale apo homoseksuale.