Krimi, edhe dy të vdekur e katër të plagosur në një ditë

Lezhë, vrasje në dasmë. Atentat në Fier e një i vdekur në Krujë

Një çifte e shkrepur pa dashje ka kthyer në mort një dasmë që zhvillohej dje në fshatin Rabosh të Rrethit të Lezhës. Një grua ka gjetur vdekjen e bërë shoshë nga saçmat e lëshuara prej një distance të afërt, ndërsa dy persona të tjerë janë plagosur rëndë. Autori i krimit, që sipas policisë është krejtësisht aksidental, është shoqëruar në komisariat, por pastaj është dashur të çohet në spital, pasi tronditja e rëndë i ka shkaktuar komplikacione të shëndetit.

Gjithçka ka ndodhur sa hap e mbyll sytë, në mes të një gëzimi në fshatin Rabosh, që bën pjesë në Komunën Balldre të Lezhës. Rreth orës 15:00, kur dasma e nisur në mesditë kishte filluar të ndizej, njëri nga dasmorët ka shkrehur pa dashje çiften dhe saçmat janë derdhur mbi njerëzit që po vallëzonin. Leze Hila, 50 vjeçe, është ndodhur në drejtimin e grykës së çiftes dhe ka rënë menjëherë përtokë e pajetë. Me pak më shumë fat kanë qenë Hile Caka, 45 vjeçe, dhe Sandër Jaci, 45 vjeç, të cilët janë transportuar menjëherë në spitalin e Lezhës e më pas drejt Spitalit Ushtarak të Tiranës. Mjekët në këtë spital thanë se dy të plagosurit janë ende në gjendje kritike dhe vetëm sot do të mund të thuhet me saktësi nëse ata kanë shanse t‘u mbijetojnë plagëve.

Ndërkohë, Policia e Lezhës, që ka mbërritur në vend vetëm pak minuta pas ngjarjes së rëndë, i ka vënë prangat 44-vjeçarit Roland Çupit, i cili konsiderohet autor i krimit. Çupi ishte i afërm i familjes që bënte dasmën dhe kishte marrë çiften me vete për ta shkrehur në ajër siç e do zakoni i dasmave shqiptare. Ai ka shkrehur njëherë çiften në ajër, por kur ka qenë duke e ulur armën, në mënyrë të pavullnetshme i ka mëshuar edhe njëherë këmbëzës. Arma është shkrehur kësaj radhe me grykën të ulur poshtë, duke i lëshuar saçmat në drejtim të dasmorëve.

Burime nga Policia e Lezhës thanë se 44-vjeçari është prangosur dhe është dërguar në dhomat e paraburgimit. Por, ndërsa policët e shoqëronin, Çupi ka shfaqur probleme shëndetësore dhe është çuar në spitalin e qytetit. Mjekët aty thanë se ai kishte kriza depresioni, që i janë shkaktuar nga tronditja.

Incidentet me armë nëpër dasma nuk janë një ndodhi e rrallë për Shqipërinë, ku gëzimi nuk konceptohet pa pushkën.

Fier, atentat kushëririt të Ben Qimes


Policia dyshon se autori është nga Vlora. Nuk përjashtohet ndonjë konflikt i vjetër i familjes


Dy persona janë plagosur rëndë në një atentat me armë të ndodhur dje në mbrëmje në qytetin e Fierit. Policia tha se njëri nga viktimat e atentatit është kushëriri i parë i Arben Isufajt, i cili njihet në Fier me nofkën Ben Qimja dhe është arrestuar si i dyshuar për një vrasje. Sipas burimeve zyrtare të policisë, mësohet se dy të plagosurit janë në gjendje të rëndë në sallën e kirurgjisë të Spitalit Rajonal Fier, ndërkohë që autor i dyshuar i atentatit është një person me banim në Vlorë, emri i të cilit nuk bëhet i ditur. Ngjarja ka ndodhur rreth orës 20:30 në lagjen "Sheq i Vogël", ku banon dhe ka ngritur bizneset e saj familja Isufaj. Amarildo Isufaj, 22 vjeç, dhe Tomor Jarua, 27 vjeç, kanë qenë në katin e parë të një kompleksi tregtar, pronë e familjes Isufaj që është në ndërtim e sipër. Sipas policisë, që ka shkuar menjëherë në vendin e ngjarjes, mësohet se të dy personat kanë qenë të ulur në një tavolinë brenda kësaj ndërtese. Autori i plagosjes së tyre mësohet se ka qëlluar nga afër. Arma e zjarrit, e cila është përdorur, ka qenë një pistoletë. Ndërkohë që i gjithë karikatori i saj është shkrehur në drejtim të Amarildo Isufajt dhe mikut të tij Tomor Jarua. Burimet e policisë bëjnë të ditur se zhurma që ka lëshuar pistoleta ka bërë që drejt ndërtesës ku ndodhi atentati të shkojnë banorë të zonës, të cilët janë të afërm dhe të besuar të fisit Isufaj. Por, autori i krimit ka arritur të largohet, ndërkohë që dy të plagosurit janë dërguar me të shpejtë drejt spitalit të Fierit. Mjekët deklarojnë për gazetën "Shqip", se gjendja e tyre është mjaft e rëndë, ndërkohë që saktësojnë se shumë plumba kanë përshkuar trupin e 22-vjeçarit Amarildo Isufaj. Spitali dhe vendi ku ndodhi atentati janë rrethuar nga policia. Kjo e fundit po mban nën kontroll të plotë edhe familjarët, si dhe të gjitha hyrjet e daljet e qytetit. Sipas burimeve zyrtare të Policisë së Fierit, autori i këtij atentati mendohet të jetë një banor i qytetit të Vlorës. Nuk bëhet i ditur emri i tij, ndërsa drejt qytetit bregdetar është nisur një grup agjentësh operacionalë. Motiv i këtij atentati mendohet të jetë ndonjë përplasje e kohëve të fundit, por policia nuk hedh poshtë edhe dyshimet se motiv mund të jetë bërë edhe ndonjë çështje e vjetër. Amarildo Isufaj, me arsim tetëvjeçar, është djali i xhaxhait të Arben Isufajt, Ahmetit. Ky i fundit ka qenë i dyshuar për trafikimin e një sasie droge të kapur teksa transportohej me një ambulancë të spitalit të Fierit. Ndërkohë që Arben Isufaj është vënë në prangat e Policisë së Tiranës në verën e këtij viti, si një ndër autorët e dyshuar të vrasjes së Pirro Koçiut. Avokati i Isufajt ka hedhur gjithmonë dyshimet se arrestimi dhe provat e ADN-së që çuan në arrestimin e Arben Isufajt kanë qenë të rreme.


Krujë


Ekspertiza mjekoligjore zbuloi përqindje të lartë alkooli në gjakun e viktimës


Bie nga shkëmbi, vdes 45-vjeçari


Trupi i një 45-vjeçari është gjetur i pajetë në malësinë e Krujës. Mungesa e Bajram Temës prej disa orësh në shtëpi kishte shkaktuar shqetësim te familjarët, ndërkohë që trupi i tij është gjetur në afërsi të vendit të njohur nga banorët e zonës si "Shkëmbi i Vajeve". Ngjarja ka ndodhur në fshatin Noj të Rrethit të Krujës. Kufoma është pikasur nga banorët e zonës, të cilët më pas kanë njoftuar rreth mesditës së djeshme policinë lokale. Identifikimi i saj është bërë shpejt dhe familjarët kanë shpallur zinë për humbjen e parakohshme të Temës.

Humbja e ekuilibrit, ndërsa kalonte në zonën shkëmbore, dyshohet t‘i ketë shkaktuar vdekjen, ndërsa orët e mungesës së tij kanë shqetësuar familjarët. Nga veprimet e para hetimore është konstatuar se viktima mund të ketë qenë i dehur kur ka gjetur vdekjen.

Disa banorë të zonës dëshmuan se e kishin parë në gjendje të dehur pak kohë përpara se të vdiste, ndërkohë që këto dëshmi janë konfirmuar edhe nga ekspertiza mjekoligjore. Ekspertët që këqyrën kufomën dhe morën mostra për të kryer analizat thanë se në gjakun e viktimës kishte përqindje të lartë alkooli.

Burime nga policia lokale bënë të ditur se hetimet për këtë rast vdekjeje nuk do të mbeten thjesht në një aksident tragjik, po do të përqendrohen dhe në mundësinë e përfshirjes së ndonjë personi të dytë në të. Hetimet do të zbardhin nëse vdekja i ka ardhur nga humbja e ekuilibrit për shkak të të qenit i dehur, apo dikush tjetër e ka "ndihmuar" në rënie.

Tropojë


Sipas policisë, bëhet fjalë për një sherr të rastësishëm


Shtiu mbi fqinjin,

arrestohet 21-vjeçari


Një i ri 21 vjeç nga fshati Geghysen i Komunës Bujan është arrestuar nga policia lokale, pasi kishte tentuar të vriste një bashkëfshatarin e tij për motive të dobëta. Ngjarja ka ndodhur në fshatin Geghysen rreth orës 20:00 të së shtunës, kur Florian Rexha 21 vjeç, gjatë një sherri, të cilin policia e cilëson si të rastit, ka qëlluar me breshëri në drejtim të bashkëfshatarit Rifat M., banor i së njëjtës lagje. Fatmirësisht plumbat e nisur nga automatiku i 21-vjeçarit nuk e kanë prekur bashkëfshatarin. Disa dëshmitarë kanë pohuar se pas grindjes që lindi mes dy komshinjve, Rexha ka hyrë në shtëpi nga ku kishte marrë automatikun dhe ka qëlluar disa herë. I kërcënuari ka shpëtuar edhe falë errësirës së mbrëmjes, ndërsa policia i ka vënë dje prangat agresorit rreth orës 09:00, duke sekuestruar edhe armën, si dhe tetë gëzhoja si provë materiale. Rexha do të përballet tashmë me dy akuza, atë të kanosjes me armë, si dhe armëmbajtjes pa leje sipas neneve 84 dhe 278 të Kodit Penal. Armëmbajtja pa lejë përbën sfidën më të vështirë për policinë lokale në verilindje, pasi shërbejnë si burim vrasjesh të njëpasnjëshme. Vrasja e fundit në Tropojë ndodhi pak javë më parë në një pritë nga autorë që ende nuk janë identifikuar.