Masakër në Laç, djali vret prindërit

Pas ekzekutimit, i hedh në gropën septike prapa shtëpisë. Policia: Pranoi krimin, por nuk i tregon motivet

Trupat e pajetë të dy bashkëshortëve janë gjetur dje në mëngjes në gropën septike të shtëpisë së tyre në fshatin Shullaz të Rrethit të Kurbinit. Ali dhe Gjyze Halili, 67 dhe 55 vjeç, janë vrarë me mjete të forta dhe më pas trupat e pajetë janë hedhur në gropën që mbledh ujërat e zeza, disa metra pas shtëpisë.

Zbulimi rrëqethës u bë dje në mëngjes nga efektivët e Komisariatit të Policisë së Laçit, të cilët, që nga e enjtja, kishin nisur kërkimet për dy personat që ishin zhdukur fare papritur. Ndërkohë, djali i viktimave, Shkëlzen Halili, është shoqëruar në polici si i dyshuar për këtë vrasje të dyfishtë.


Zhdukja

Ali dhe Gjyze Halili jetonin prej disa vitesh vetëm me djalin e tyre, Shkëlzenin, në fshatin Shullaz të Kurbinit. Në këtë fshat jetojnë edhe të afërm të tjerë të tyre, të cilët të enjten kanë dhënë alarmin për zhdukjen e çiftit. Zëdhënësja e Drejtorisë së Policisë së Qarkut të Lezhës, Eljona Nika, tha dje për gazetën "Shqip" se 67-vjeçari Ali Halili dhe gruaja e tij 55 vjeçe, Gjyze Halili, ishin shpallur të humbur pasi vëllai i Aliut kishte bërë një denoncim në polici. "Ismail Halili është paraqitur në polici pasi ka vënë re mungesën e gjatë të vëllait, Aliut, dhe bashkëshortes së tij", tha zëdhënësja. Ajo sqaron se menjëherë pas marrjes së informacionit, policia ka nisur kërkimet për gjetjen e dy personave, por nuk ka mundur të bjerë në gjurmët e tyre, deri sa dje, teksa ka bërë një kontroll të imtësishëm të banesës ka gjetur dy trupat e pajetë.


Vrasja

Sipas ekspertëve të policisë, burrë e grua janë vrarë me mjete të forta dhe prerëse. "Kur policia gjeti trupat, ata kishin të paktën tri ditë që kishin vdekur", tha dje zëdhënësja e Policisë së Lezhës, e cila iu referohej të dhënave paraprake të dala nga kryerja e autopsisë së dy kufomave. Ekspertët mjekoligjorë gjetën plagë të shumta dhe shembje në trupat e Ali dhe Gjyze Halilit dhe kanë përcaktuar se vdekja ka ardhur nga goditjet me mjete prerëse, si dhe nga trauma të shkaktuara nga mjete të forta. Ekspertët gjetën në vendngjarje elementë të shumtë që provojnë se viktimat janë vrarë diku tjetër dhe pastaj janë hedhur në gropën septike, e cila është hapur dhe mbyllur në një kohë të shkurtër. Shenjat e një gërmimi të freskët pranë gropës septike kanë drejtuar policët për te vendi ku u gjetën trupat e pajetë.


Djali

Policia ka vendosur të kontrollojë shtëpinë, pasi ka vënë re se djali i viktimave, Shkëlzen Halili, 31 vjeç, ka dhënë deklarata kontradiktore në lidhje me zhdukjen e tyre. Burime konfidenciale nga grupi hetimor i ngritur për këtë ngjarje thanë për gazetën se 31-vjeçari që vuan nga çrregullime mendore ka qenë shumë i paqartë në dëshminë e tij. "Kur i kemi bërë me dije se dyshonim për një vrasje të kryer nga ana e tij, Shkëlzeni reagoi në një mënyrë që na i shtoi dyshimet, ndaj vendosëm të kontrollonim menjëherë ambientet e shtëpisë", tha një oficer policie që është angazhuar prej ditësh me këtë çështje. Vetëm disa orë pas gjetjes së kufomave, 31-vjeçari Shkëlzen Halili ka pranuar se ka qenë ai autor i vrasjes. Krerët e Policisë së Lezhës e kanë arrestuar 31-vjeçarin dhe kanë filluar kërkimin për prova që e implikojnë atë në vrasjen makabre. Ekspertët e policisë kanë hyrë dje në shtëpinë e Halilëve dhe kanë mbledhur prova, të cilat, pasi t‘u nënshtrohen analizave laboratorike, do të vërtetojnë nëse vrasja e dyfishtë ka ndodhur në ambientet e shtëpisë.

Shkëlzen Halili, i cili kishte qenë për një kohë të gjatë emigrant në Itali, jetonte prej tre vjetësh me prindërit në fshatin e lindjes. Ai vuante nga çrregullime mendore, por kishte refuzuar të kurohej. Shkëlzeni ka edhe një motër dhe një vëlla, të cilët jetojnë në Itali.

Rasti


Në janar, djali vrau

prindërit në Çikago


Një krim i rëndë me protagonistë shqiptarë ndodhi në muajin janar të këtij viti në Çikago të shtetit Illinois të Shteteve të Bashkuara të Amerikës. Artur Shehu, 33 vjeç, lindur në Konispol qëlloi me armë zjarri prindërit e tij. Ata vdiqën menjëherë si pasojë e plagëve në kokë. Pas krimit, Artur Shehu, i cili punonte si taksist, mori në telefon policinë dhe rrëfeu vrasjen. Në telefonatën e tij me policinë ai tha se "djalli me kokë të madhe" do ta merrte. Ai kishte lënë një shënim në shtëpi, ku shkruante se do të digjte veten, ndërsa hiri i tij do të hidhej në lumë. Ai kishte shkruar gjithashtu që nëna dhe babai të varroseshin në Shqipëri, në qytetin e Konispolit, siç edhe ndodhi. Policia gjeti pak orë pas krimit makinën e braktisur të emigrantit, anës një liqeni që ndodhej në zonën ku ai banonte. Ditë më pas, policia gjeti trupin e pajetë të Artur Shehut dhe nga ekspertiza mjekoligjore u konkludua se ai ishte vetëvrarë, sikundër edhe kishte paralajmëruar.