Shkumbini rikthen dhunën në Superiore

Deputeti Dashnor Sula zihet në pushim të ndeshjes teknikun Ilir Daja

E shtuna ka shënuar rikthimin e dhunës në Kategorinë Superiore. Fusha e nxehtë vazhdon të mbetet ajo e Peqinit, ku vetëm pas katër javëve kampionat u regjistrua episodi i parë i shëmtuar. Në takimin Shkumbini-Besa, e cila ka qenë mjaft e tensionuar që prej fillimit, nuk ishte e vështirë që situata të degjeneronte dhe viktima janë bërë një pjesë e mirë e lojtarëve kavajas dhe trajneri Ilir Daja. Gjatë pjesës së parë të takimit, drejtuesi i stolit verdhezi, por edhe lojtarët në fushë, janë ankuar sistematikisht për gjykimin e njëanshëm të arbitrit Erjon Dobi, i cili favorizonte vendasit. Pas mbylljes së 45 minutave të para, në hyrjen për në dhomat e zhveshjes filloi edhe "ferri". Deputeti i këtij qyteti, Dashnor Sula, trajneri i portierëve të Shkumbinit dhe disa persona të tjerë keqtrajtuan lojtarët miq. Viktima e parë e dhunës fizike u bë sulmuesi Bekim Kuli, i cili ka pësuar çarje në fytyrë. Për të mbrojtur lojtarët e tij, në mes ka hyrë edhe trajneri Ilir Daja, por edhe për të është rezervuar i njëjti trajtim. I rrahur nga "pushtetari" dhe personat e tjerë, Daja ka reaguar duke goditur deputetin Sula dhe kjo solli reagimin e forcave të rendit. Për t‘u theksuar është fakti se fillimisht, gjatë dhunës ndaj lojtarëve miq, uniformat blu nuk kanë reaguar, por qëndronin në rolin e spektatorit. Pas këtij epidosi, konfrontimi i drejtuesit të stolit të Besës me stafin teknik të Shkumbinit vazhdoi edhe në fillim të pjesës së dytë dhe kjo shkaktoi tensionim të situatës edhe në shkallët e stadiumit. Për të qetësuar situatën u desh ndërhyrja e trajnerit peqinas, Gugash Magani, i cili shkoi në stolin e miqve dhe takoi Ilir Dajën, si për t‘i treguar tifozëve se gjithçka ishte në rregull. Por, në fund të ndeshjes, Daja u shoqërua në komisariatin e policisë dhe pas një kohë të shkurtër qëndrimi u la i lirë. Mësohet se për incidentin askush nuk ngriti padi penale. Ndërkohë, deputeti Sula mohoi akuzat: "Unë nuk jam përzier fare dhe nuk mendoj se ka ndodhur diçka e jashtëzakonshme, tha ai. E vërteta është se në pushim të ndeshjes kishte gjaknxehtësi të lojtarëve, pasi kishte pretendime ndaj gjykimit. Pas futbollistëve ngjarja përfshiu edhe trajnerët, ndonëse u mbajt nën kontroll. Unë ndërhyra që policia të mos shoqëronte trajnerin e Besës". Megjithatë, Bekim Kuli konfirmoi ngjarjen dhe se është qepur tre herë në buzë. Ndeshja u mbyll me fitoren 1-0 të vendasve me golin e Erjon Rizvanollit në minutën e 66-të dhe tashmë ata mbajnë vendin e dytë në klasifikim me 9 pikë. Megjithatë, ky episod do të shqyrtohet nga organet kompetente, të cilat duhet të marrin masa të menjëhershme, pasi dhuna vetëm pas 4 javëve të Superiores mund të shndërrohet në një precedent të rrezikshëm. Nga ana e tij, deputeti Dashnor Sula nuk është i panjohur për problemet në ambientin peqinas. Afro dy vjet më parë ai u bë shkaktar i dënimit të fushës së Shkumbinit, pasi dhunoi presidentin e Partizanit, Albert Xhani, dhe futbollistët e kësaj skuadre.

Tirana - Pas ndeshjeve të djeshme Tirana mori kreun e klasifikimit. Bardheblutë e drejtuar nga Slishkoviç fituan 2-0 në fushën e Apolonisë, me gola të Andi Lilës dhe Migen Memellit. Edhe pse nuk bindin me lojë, 23 herë kampionët kanë treguar forcë në ndeshjet jashtë fushe (3 nga 4 takimet i kanë luajtur larg Tiranës), ku kanë marrë 7 pikë. Emocionet dhe tensioni nuk kanë munguar as në sfidën e luajtur në Vlorë, ku Flamurtari fitoi 1-0 me Vllazninë. Vendimtar ishte goli i Brajkoviç, në minutën e 25-të, megjithatë kuqezinjtë kanë pasur më shumë se një rast për të dyfishuar. Në fund sfida u tensionua, mbi të gjitha pas daljes nga loja të Begës për vendasit me karton të kuq. Me këtë humbje shkodranët e Agim Canajt zbresin në vendin e tretë.


Superiore / Java 4

Ora 16:00


DJE

Shkumbini-Besa 1-0

Rizvanolli 66‘

Apolonia-Tirana 0-2

A. Lila 30‘, Memelli 35‘

Flamurtari-Vllaznia 1-0

Brajkoviç 25‘


SOT

Dinamo-Elbasani S. Çekaj

Bylis-Lushnja K. Meta

Teuta-Partizani A. Lulaj


Klasifikimi

Skuadra N F B H gol. Pikë

1. Tirana 4 3 1 0 5-1 10

2. Shkumbini 4 3 0 1 7-4 9

3. Vllaznia 4 2 1 1 5-3 7

4. Elbasani 3 2 1 0 2-0 7

5. Flamurtari 4 2 0 2 3-3 6

6. Dinamo 3 1 2 0 3-1 5

7. Besa 4 1 1 2 3-4 4

8. Apolonia 4 1 1 2 3-5 4

9. Partizani 3 1 0 2 3-4 3

10. Lushnja 3 1 0 2 2-4 3

11. Teuta 3 0 1 2 0-2 1

12. Bylis 3 0 0 3 3-8 0