Lorik Cana: Na mposhti talenti i Xherard

Kuqeziu, që shënoi në portën e Liverpulit, i zhgënjyer për humbjen

Lorik Cana shprehet i zhgënjyer për humbjen në takimin e parë në Ligën e Kampioneve, edhe pse përballë Olimpiku i Marsejës kishte Liverpulin. Për shqiptarin, meritat për triumfin e skuadrës së Rafa Benitez i shkojnë Stiven Xherardit, që realizoi dy gola. "Po të vëzhgoni golin (e parë të mesfushorit anglez, që barazoi rezultatin në 1-1), për ta realizuar ishte i nevojshëm i gjithë talenti i Xherard", deklaroi ai në konferencën për shtyp pas ndeshjes. "Megjithatë, Liverpuli është një ekip i madh dhe shumë mirë i organizuar. Është e jashtëzakonshme të shohësh se asnjëherë ata nuk luajnë duke u mbrojtur. Këtu flas për Dirk Kuijt, që në aksionin ku ata fituan 11-metërsh, përshkroi 40 metra fushë me sprint për të mbështetur aksionin. Këta lojtarë janë të admirueshëm për atë që bëjnë dhe janë shembuj nga të cilët duhet të mësojmë për të ecur përpara".

Kapiteni i francezëve pohoi se përpara sfidës e parandjeu se do të shënonte gol në portën e "Reds"-ave. Cana kishte paralajmëruar babanë e tij, Agimin dhe në minutën e 23-të të ndeshjes përshëndeti rrjetën e portës së mbrojtur nga Reina, duke sjellë avantazhin e përkohshëm 1-0 të Marsejës. "Gjëja më e pabesueshme është se përpara ndeshjes kisha paralajmëruar babanë tim se do të shënoja. Unë jam një lloj futbollisti që nuk shënoj shumë, e për këtë arsye ky gol është i rrallë, sqaroi 25-vjeçari. Në detyrat që na kishte caktuar trajneri Gerets, unë dhe Benua Sherju duhej të ndiqnim aksionet sulmuese dhe të ishim sa më të rrezikshëm në zonën e kundërshtarit". Megjithatë, zhgënjimi për humbjen është i madh. Cana shtoi: "Kur dëgjuam fërshëllimën finale të takimit u zhgënjyem shumë, pasi e gjithë puna që kishim bërë për të përgatitur këto 90 minuta dhe ajo që treguam në fushë i humbën vlerat për shkak të rezultatit. Do të ishim të kënaqur nëse do të barazonim apo fitonim, pasi në futboll rezultati është ai që vlen më shumë. Në këtë mëngjes (dje), nuk mund të jem veçse shumë i zhgënjyer".

Për mesfushorin e Kombëtares shqiptare, të dy golat ishin të shmangshëm dhe po të tregohej më e vëmendshme, skuadra nuk do t‘i kishte pësuar. "Mendoj se nuk duhej t‘i kishim pësuar të dy golat e Liverpulit, që më pas i dhanë edhe fitoren kësaj skuadre, përfundon Cana. Përpara ndeshjes, të gjithë e dinim se duhej të tregoheshim të kujdesshëm, por ndonjëherë nuk mund ta parashikosh se çfarë do të ndodhë gjatë një aksioni. Ai gol (i pari i anglezëve) mund të evitohej fare lehtë, por rrjeta të tilla mund të pësohen kur luan përballë njërit prej lojtarëve më të mëdhenj në botë. Nëse Xherard nuk do ta kishte shënuar atë gol, që solli barazimin e shpejtë, Liverpuli do ta kishte shumë të vështirë të rifutej në lojë. Ndërsa në episodin e penalltisë u befasova, pasi topi që u nis nga zona kundërshtare ishte pa pretendime. Përveç një rasti të Stiv Mandanas në fund të pjesës së dytë, nuk mbaj mend që kundërshtarët të kenë pasur ndonjë tjetër rast të mirë për shënim".