Sot, dita e parë e shkollës, 50 mijë vogëlushë në klasën e parë

Ministri i Arsimit, Beja: Interneti do të jetë shok edhe në fshatrat e humbura

Gjyshërit, prindërit, motrat
dhe vëllezërit më
të mëdhenj sot do të
përcjellin më të vegjlit
në shkollë. Do të jetë dita e parë
e shkollës për 50 mijë fëmijë, të
cilët do të bëjnë mësim dhe do
të ulen në bankë për herë të parë.
Edhe pse nuk i njohin mësueset,
u kanë përgatitur atyre tufa
me lule, urime dhe madje kanë
mësuar të bëjnë një prezantim
të shkurtër për veten, apo një
tregim se ku i kaluan pushimet
verore. Jo vetëm për klasat e para,
por edhe për nxënësit e tjerë, ky
vit shkollor do të ketë ndryshime.
Duke nisur nga klasa e 9-të,
më pas cikli 3-vjeçar dhe duke
arritur kështu në një nga pikat e
reformës aq të përfolur në arsim.
Rreth 433 mijë nxënës të arsimit
parauniversitar në rang kombëtar
do të fillojnë sot vitin e ri shkollor
2008-2009, i cili për herë të parë
do të funksionojë me strukturën
e re arsimore 5+4+3, e ngjashme
me shumë vende të Rajonit dhe
Evropës.
Si pasojë e kësaj strukture,
këtë vit në 376 shkolla të mesme
nuk ka regjistrime në vitin I,
ndërsa pritet që më 15 shtator,
në 1749 shkollat e mesme, në
bankat e klasave të para fillore
të ulen rreth 50 mijë nxënës
dhe në klasat IX rreth 55 mijë të
tjerë. "Libri dhe interneti do të
jenë shokët tuaj të përditshëm,
jo vetëm në qytete, por shumë
shpejt edhe në fshatrat më të
humbur të Malësisë. Këtë vit
shkollor, shkolla do t‘u japë krahë
të panumërt ëndrrave dhe fantazisë
suaj, asnjë kufi tokësor nuk
do ta pengojë më lundrimin tuaj
në botën e pafund të internetit;
ju do të jeni pjesë e bashkësisë
së moshatarëve tuaj në të gjithë
globin; do të mund të lidheni me
ta, të mateni me ta, të fitoni garat
me ta", tha ministri Beja. Ministri i
Arsimit dhe Shkencës, Fatos Beja,
ka deklaruar se nxënësit në ditën
e parë të shkollës, më 15 shtator,
do të kenë në duar të gjitha tekstet
shkollore. Përpara fillimit të
vitit shkollor, 36 librari të Tiranës
janë furnizuar me mbi 405 tituj
tekstesh, nga 30 shtëpi botuese.
Me reformën e teksteve, Ministria
e Arsimit nuk është më zotëruese
e së drejtës për të përzgjedhur në
mënyrë përfundimtare tekstin
që do të vendoset në bankën e
nxënësit. Kjo e drejtë u ka kaluar
mësuesve, që e përdorin tekstin
me nxënësit e tyre. Për këtë
qëllim, lejohet që, në vend të një
teksti të detyruar nga ministria,
mësuesit t‘i paraqiten variante
të ndryshme të përgatitura nga
botues privatë, prej të cilëve ai
përzgjedh ata që quhen tekste
alternative. Gjithashtu fondet e
subvencionit shtetëror për tekstet
shkollore nuk shkojnë për të
financuar prodhuesit e teksteve,
botuesit dhe kompanitë e shtypshkrimit.
Këto fonde kalojnë në
dorën e përdoruesve të teksteve,
prindërve dhe nxënësve. Dje, ministri
i Arsimit dhe i Shkencës ka
uruar të gjithë nxënësit për çeljen
e vitit të ri akademik. "Në mënyrë
të veçantë uroj vogëlushët dhe
vogëlushet që, për herë të parë,
hyjnë në udhën e bukur e të pafund
të diturisë. Ata që janë sot
shpresa, krenaria dhe dashuria e
prindërve dhe gjyshërve të tyre,
por njëkohësisht edhe e ardhmja,
tërësisht evropiane, për Atdheun
tonë Shqipërinë", tha në mesazhin
e tij ministri.