Partizani, nën presionin e tifozëve në derbi

Fansat e të kuqve paralajmërojnë "revoltë" pas një humbjeje të mundshme

"Count-down" po bie. Tirana e Partizani bëhen gati për sfidën e madhe mes rivalëve historikë, derbin numër 132. Kjo përballje ka dhuruar gjithmonë emocione të mëdha, të cilat do të jenë të garantuara edhe këtë herë, edhe pse palët duket se nuk ndeshen në pozita të barabarta, për shkak të zhvillimeve në muajt e fundit. Skuadrat para vuajnë ankthin e pragndeshjes, ndërsa në fund vuajnë emocionet e kundërta që prodhon kjo sfidë: fituesi gëzon dhe humbësi ikën kokulur dhe i zhgënjyer. Jo më pak e vuajnë fatin e derbit edhe tifozët të "armiqësuar" sportivisht deri në maksimum. Të dyja tifozeritë janë të uritura për fitore. Për shumë prej tyre, më shumë vlerë ka kjo ndeshje se fitimi i titullit kampion të Shqipërisë, prandaj presioni i tyre ndaj skuadrave të preferuara është i madh. Parashikohet një "Selam Stërmasi" i mbushur plot e përplot, aq sa ditët e fundit edhe tifozeritë përkatëse e kanë quajtur "të vogël" për të mbajtur peshën e kësaj ndeshjeje. Por një presion shumë herë më i madh do të rëndojë mbi shpatullat e Partizanit. Tifozeria e tij, e etur për një skuadër pretendente, mbërrin në këtë pragndeshje me shumë pakënaqësi. Situata në kampin e kuq nuk duket premtuese, kjo për shkak të problemeve të mëdha që prekën gjatë verës klubin e drejtuar nga presidenti Albert Xhani. Kriza financiare ishte shkaktari kryesor i një shkatërrimi total të atij ekipi, që në sezonin e kaluar (të vetmit në 10 vitet e fundit), bëri tifozerinë "Demat e Kuq" të besojë se mund të fitojnë një titull. Edhe pse e humbën atë në ndeshjen e fundit, ajo skuadër tregoi se kishte potencialin për të pretenduar. Por tashmë prej saj ka mbetur vetëm Hallaçi, Bakaj, Babamusta e portieri Shehi. Të tjerët i përpinë klube të ndryshme. Dhe këtë tifozët nuk ia kanë harruar presidentit të tyre. Madje, tre prej tyre (Osmani, Devolli, Muzaka), me dorën e vetë Xhanit, iu dhanë rivalit historik dhe sot të jenë kundër ish-skuadrës. Tifozët e kuq, fitoren 4-1 ndaj bardhebluve duket se e kanë harruar, por nuk u hiqet nga mendja shpërbërja e ekipit. Rezultatet në dy ndeshjet e para kanë qenë zhgënjyese: një fitore në Lushnje dhe një humbje ndaj një rivali direkt si Vllaznia në "Qemal Stafa". Dhe kjo u shtohet pakënaqësive të fansave, të cilët nuk do ta braktisin Partizanin sot në derbi, por kanë premtuar se nuk kanë ndërmend të tolerojnë dështimin ndaj bardhebluve. Madje, burime pranë tyre zbulojnë se e kanë gati "revoltën" ndaj drejtuesve të klubit, por i kanë dhënë edhe një "shans" të fundit: derbin. Megjithatë, futbollistët premtojnë se do ta shfrytëzojnë në maksimum këtë "shans". Nga kampi i kuq theksohet se nuk ekziston frika. Lika, edhe pse nuk do të jetë në stol për shkak të pezullimit, e ka përgatitur me një synim të vetëm fitoren. Ai pritet t‘ua besojë këtë brazilianëve të ardhur së fundmi: Roma, Bruno e Kastelani, por edhe ish-sulmuesin e Kievos, Xhulian Rrudho. Duhet të mposhtin "ish"-ët, atë që nga kampi i kundërt betohen se mezi presin ta shohin Partizanin "të vuajë si një bishë plagosur".