Kuqezinjtë në kor: Ndaj Maltës, 3 pikë

Objektivi i vetëm i Shqipërisë në sfidën kundër maltezëve është vetëm fitorja

Barazimi kundër Suedisë së konsideruar si një nga pretendentët për vendin e parë në grupin 1 të eliminatorëve, ka lënë një vello kënaqësi te kombëtarja shqiptare. Për më tepër, ai ka lënë pas edhe një moral të lartë të kuqezinjve, një gjë e domosdoshme dhe i bën vetëm se mirë futbollit.

Malta

Por kohë për festë nuk ka, pasi distanca për takimin e radhës është e shkurtër. Në derë ka mbërritur Malta dhe Shqipërinë e pret një objekti i vetëm: fitorja. Toleranca këtu nuk ka aspak vend. Bëhet fjalë për një jo i nivelit të Suedisë, por nënvlerësimi mund të shembë gjithçka të ndritur deri tani. Skuadra e trajnerin Dusan Fitzel nuk duket se i trembet përballjes me ne, edhe pse do të ketë mungesën e mbrojtësit Ian Azopardi, për motive familjare. Kapiteni Gilbert Agius ka deklaruar: "Do të luajmë, ashtu siç dimë. Vetëm kështu ne mund të arrijmë rezultate. Duhet të kujdesemi vetëm për veten tonë". Kundër Portugalisë, maltezët demonstruar një lojë të dobët, duke mos u bërë për asnjë moment problem për "brazilianët" e Evropës. Pësuan një humbje të thellë 0-4 në shtëpi. Megjithatë nuk duhet paragjykuar nga kjo. Ambiciet e Maltës nuk janë të mëdha, por një nga objektivat e saj është të lërë pas në renditjen e grupit njërin nga kundërshtarët e grupit. Dhe shpresat më të mëdha të tyre janë të përfitojnë diçka në përballjen ndaj nesh.

Tri pikët

Ndërsa ne, nëse kemi objektiv të përmirësojmë veten tonë në krahasim me të kaluarën, është më shumë se detyrim që t‘i shfrytëzojmë në maksimum ndeshje të tilla. Edhe pse duhet të ruhen nga euforia dhe vetë kuqezinjtë e dinë mirë një gjë të tillë. Të gjithë në kor e kanë bërë të njohur se synimin e vetëm të kësaj ndeshjeje dhe ka një seriozitet në vlerësimin e kësaj ndeshjeje. Mes fjalëve të tyre shikohet dëshira për ta mbajtur lart entuziazmin e post-Suedisë. Duke filluar që nga trajneri Hari Han, i cili vendin që gjeti në zemrën e shqiptarëve pas Suedisë duhet ta mbajë gjithmonë, vetëm duke e merituar. "Për ne festa mbaron këtu, pasi festa e madhe është Malta, tha tekniku holandez. Po ju them që do të jetë një ndeshje e vështirë, shumë e vështirë. Do të jetë një takim tjetër për nga natyra se si do ta interpretojmë lojën. Mund të ndryshojmë edhe në formacionin titullar". Por Han nuk është i vetëm. Si ai mendojnë edhe protagonistët kryesorë, që duhet ta realizojnë atë, duke filluar nga kapiteni Altin Lala, apo zëvendësi i tij, Lorik Cana. "Mendoj se do të jetë një ndeshje e vështirë", thotë Lala. "Duhet të japim maksimumin, pasi vetëm fitorja është rezultati që na kënaq", mbështet Cana. Skela kërkon përqendrim: "Nuk duhet nënvlerësuar asnjë kundërshtar. Duhet të marrim tri pikë medoemos". Dhe sigurisht, pasi çdo gjë përveç tri pikëve do të ishte vetëm një dështim.




Kundërshtari


Malta, mbrëmë vonë në Tiranë


Ndeshja e të mërkurës është shumë pranë. Kundërshtari i të mërkurës, Malta, na ka mbërritur në derë. Pikërisht në orët e vona të natës së të dielës ata kanë zbritur në aeroportin ndërkombëtar "Nënë Tereza". Më pas i janë drejtuar kryeqytetit shqiptar, ku dhe janë akomoduar në orët e para të mëngjesit të sotëm në ambientet e hotel "Rogner". Sikurse është bërë e njohur, holandezët kanë nxituar të mbërrijnë në tokën shqiptare për t‘u ambientuar para ndeshjes, jo vetëm me klimën tonë, por edhe me fushën ku do të zhvillohet takimi i të mërkurës, "Qemal Stafa". Në ndeshjen e parë të luajtur në shtëpi të shtunën në mbrëmje, kundër Portugalisë, Malta pësoi një humbje të thellë 0-4. Sot dhe nesër ata kanë parashikuar nga një seancë stërvitore në ditë, për të qenë të gatshëm të mërkurën ndaj kuqezinjve në "Qemal Stafa".


Përgatitja


Shqipëria e ka

seriozisht ndaj Maltës


Vetëm pak orë liri kanë pasur në dispozicion kuqezinjtë, për të shijuar "pa frerët" e trajnerit Ari Han festën e atij rezultati, të konsideruar premtues ndaj Suedisë. Kjo për faktin se pas lejes së dhënë menjëherë pas largimit nga "Qemal Stafa", atyre u është dashur të grumbullohen në mesditën e djeshme, për të nisur përgatitjet për sfidën e të mërkurës kundër Maltës. Kundërshtari vërtet është inferior, por megjithatë përgatitja e kësaj ndeshjeje meriton seriozitetin e duhur për të përmbushur qëllimin që Shqipëria i ka vënë vetes: marrjes së tri pikëve. Pasditen e djeshme futbollistët janë vënë nën urdhrat e trajnerit holandez dhe i janë drejtuar fushës "Skënder Halili" për të zhvilluar stërvitjen e parë. Lajmi i mirë është se tekniku ka të disponueshëm të gjithë lojtarët e grumbulluar. Nuk ka asnjë të dëmtuar edhe pse ndeshja ndaj suedezëve ishte jo pak e ashpër. Për fat të mirë edhe Dallku njoftohet se nuk ka asgjë dëmtim.

Shpërblimi


Suedia e Malta, nën një premio


Fitorja e mundshme me Maltën do të mbushë xhepat e kuqezinjve. Kjo pasi FSHF, si në çdo kompeticion të këtyre viteve të fundit, ka parashikuar edhe premiot për ndeshjet përkatëse. Dhe barazimi për Suedinë e meriton një të tillë, pasi rezultati ishte shumë më pozitiv se një barazim, kur mendon se kundërshtari ishte i nivelit që tremb shpesh edhe të mëdhenjtë e kontinentit. Por në rastin konkret ai ka munguar, por vetëm për pak kohë. Ose më mirë është shtyrë për t‘u dhënë në festën e madhe, atë të fitores kundër Maltës, ku do të bëheshin bashkë dy premio. Këtë e konfirmon shefi i marrëdhënieve me median në FSHF, Dritan Kokona. "Sigurisht që do të ketë premio për barazimin me Suedinë, pohon Kokona, por futbollistët do t‘i marrin në dorë vetëm pas ndeshjes me Maltën, të mërkurën". Ndërkohë që sipas Kokonës ende nuk është publikuar se sa do të vlerësohet barazimi me Suedinë dhe sa fitorja e mundshme me Maltën. Gjë që ngelet për t‘u verifikuar në ditët e ardhshme.