PD, ligj të ri për Ina Ramën

Opozita: Nuk japim konsensusin

Ligji për Prokurorinë është "shashka" e parë që do të hidhet në lojë me fillimin e sesionit të ri parlamentar. Mazhoranca ka përgatitur ligjin e ri për Ina Ramën dhe miratimi i tij kërkon 84 vota. Lajmi është konfirmuar nga numri dy i PD-së, Astrit Patozi.

Ndryshimet në projektligjin për prokurorinë janë hartuar nga ekspertë të disa fushave, mes tyre edhe përfaqësues të zyrës së Prokurorisë së Përgjithshme dhe misioneve ndërkombëtare që asistojnë sistemin e drejtësisë në vend. Drafti i hartuar nga Ministria e Drejtësisë, drejtpërdrejtë nga zëvendësministri Viktor Gumi, dhe përfaqësuesi i zyrës së Prokurorisë së Përgjithshme, Kujtim Lulaj, parashikon ndryshimin e 30 neneve të Ligjit për Prokurorinë, kryesisht për rregullimin e karrierës së prokurorëve, ndryshimin e masave dispiplinore, promovimin e prokurorëve dhe neni për kompetencat e Prokurorisë së Përgjithshme. Burime nga Partia Demokratike bëjnë të ditur se Prokuroria e Përgjithshme parashikon jo ngushtim të kompetencave të tij. "Nuk ka asnjë ligj që vë nën kontroll punën e organit qendror të akuzës, madje Prokuroria e Përgjithshme ka pasur dy përfaqësues të saj në komisionin që u mor me ndryshimet përkatëse, që prej janarit 2008, në kohën kur nisi edhe diskutimi", tha ish-ministri i Drejtësisë, Aldo Bumçi. Ministri i Drejtësisë, Enkelejd Alibeaj, do të bëjë të ditur sot në një konferencë për shtyp qëndrimin e tij mbi kompetencat e Prokurorisë së Përgjithshme. Ministri Alibeaj i cilëson ndryshimet si domosdoshmëri në kuadër të reformimit të Prokurorisë dhe harmonizimit të praktikave më të mira të legjislacioneve të vendeve të BE-së. Ndryshimet në Ligjin për funksionimin e Prokurorisë pritet të diskutohen në këtë sesion parlamentar.

Ligji për Prokurorinë

Miratimi i ligjit për Prokurorinë kërkon 84 vota në Kuvend, ndërkohë që kreu i grupit parlamentar të PD-së, Astrit Patozi, kërkon konsensusin e opozitës për kalimin e këtij ligji.

"Ky është një nga ligjet e rëndësishme të reformës në drejtësi dhe ne kemi gjithë angazhimin dhe prirjen për ta çuar këtë reformë deri në fund. Pra jo vetëm për ligjin e Prokurorisë por dhe ligje të tjera që vijnë më pas", u shpreh Patozi. Duke i lënë rrugë të hapur bashkëpunimit me opozitën, Patozi u shpreh se

"kjo ka nevojë dhe për angazhimin e opozitës dhe kontributin e saj. Ka ndryshim të madh mes dy çështjeve, ne kemi pasur mundësinë që disa prej reformave të mëdha, atë zgjedhore dhe në drejtësi, të gjenim numrin magjik 84 vota, por nuk e kemi kërkuar asnjëherë atë, pra në këto reforma ku kemi rënë dakord bashkërisht që t‘i miratojmë me konsensus, ne do vijojmë të kërkojmë konsensusin e opozitës".

Sesioni i ri

Kryetari i grupit parlamentar të PD-së, Astrit Patozi, theksoi se "miratimi i ligjit ‘Për hapjen e dosjeve për ish-bashkëpunëtorët e Sigurimit të Shtetit‘ dhe Kodi i ri Zgjedhor janë dy prioritetet e punës së Kuvendit me fillimin e sesionit kuvendor më 1 shtator". Sipas Patozit, dje u mblodh Konferenca e Kryetarëve të grupeve parlamentare, e cila miratoi kalendarin trijavor të punimeve të Kuvendit. "Shpresojmë që të paktën në dy javët e para të muajit shtator të kalojmë bashkërisht me opozitën ligjin e ashtuquajtur të ‘dosjeve‘", u shpreh Patozi. Ndërsa për sa i takon prioritetit tjetër, Kodit Zgjedhor, ai tha se "kjo është një punë në proces, e cila nuk ka ndalur edhe gjatë muajit gusht, por ai që do ta thotë fjalën e tij do të jetë Komisioni i Posaçëm, i cili do të nisë menjëherë axhendën e tij me miratimin e ligjit të ri zgjedhor". Pas një ndërprerjeje njëmujore të aktivitetit parlamentar, të hënën nis nga puna sesioni i ri i Kuvendit. Janë komisionet e përhershme parlamentare ato që do të rifillojnë veprimtarinë e tyre të parat, ndërsa seanca e parë plenare e Kuvendit pritet të mbahet më 8 shtator. Të hënën, më 1 shtator, nis punimet sesioni i ri parlamentar i Kuvendit të Shqipërisë. Konferenca e Kryetarëve të Grupeve Parlamentare, vendosi që data 1 shtator të shënojë edhe fillimin e punës së institucionit më të rëndësishëm legjislativ në vend. Aktiviteti parlamentar pritet të nisë fillimisht me punën e komisioneve të përhershme të Kuvendit, ndërsa seanca e parë plenare për këtë sesion do të mbahet më 8 shtator.

PS: "Jo" konsensus për ligjin mbi organin e akuzws


Braçe: Nuk u njoftuam se kishte konferencë kryetarësh


Opozita nuk tregohet e gatshme të japë konsensus për projektligjin mbi prokurorinë. Nënkryetari i grupit parlamentar socialist, Erion Braçe, deklaroi në një prononcim për gazetën se kjo nismë është ndërmarrë në mungesë transparence. Sipas tij, opozita nuk ka qenë prezentë në asnjë nga etapat e hartimit të draftit për ligjin në fjalë. "Ne e kemi marrë vesh nga ndërkombëtarët kur paralajmëruan se mazhoranca po ndërmerr një hap të tillë", theksoi Braçe. Ai vlerësoi se e djathta, gjithsesi, është e lirë të kërkojë bashkëpunimin e opozitës për këtë ligj, por kjo nuk është detyruese. Duke u ndalur në aq sa bëhet publike për draftin, Braçe argumenton se ky është një sulm mbi prokurorinë, kur ajo po heton korrupsionin e qeverisë. Për sa i takon ligjit të "spiunëve", drejtuesi socialist mendon se qëndrimi i socialistëve është bërë më se i qartë. "Për sa kohë Partisë Demokratike i kujtohet kjo nismë në vitin e fundit të qeverisjes, duket se nuk përbën më prioritet për të", nënvizoi Braçe. Qëndrimi i selisë rozë, tha ai, është në përputhje të plotë me rezolutën e miratuar në Këshillin e Evropës për këtë çështje. Shumica, insiston Braçe, është e lirë ta miratojë nismën me votat e saj, por të paktën nuk do të ketë me vete si bashkëfajtore opozitën. Numri dy i socialistëve denoncon se edhe sesioni i ri kuvendar po fillon me shkelje kushtetuese dhe të rregullores së këtij institucioni. Partia Socialiste thotë se nuk është njoftuar se kishte mbledhje të konferencës së kryetarëve në ditën e djeshme. "Asnjë prej nesh nuk u njoftua për mbledhje kur duhet të ishim pjesëmarrës", u shpreh Braçe. Teksa shtoi se kjo ka ndodhur me porosi të Kryetares së Kuvendit, Jozefina Topalli. Kjo e fundit, në vlerësimin e Braçes, po e nis punën në sesionin e ri me çizmen e djathtë, me të cilën e mbylli atë të fundit. Partia më e madhe e opozitës thotë se kalendari i punës nuk mund të quhet i miratuar nëse nuk kalon për miratim në seancë. Vetëm pas këtij momenti, sqaron Braçe, mund të zbatohet dhe të procedohet me kalendarin. Një tjetër shkelje e vënë re prej tij ka të bëjë me faktin se sesioni nuk fillon me mbledhje komisionesh, por me mbledhje seance. "Duhet të ishin ofruar tre seanca në javën e ardhshme dhe në fakt s‘ka asnjë", ngulmon Braçe. Këto veprime, në konstatimin e tij, kryhen nga Topalli për t‘i ardhur në ndihmë Kryeministrit Berisha të kalojë këtë moment të vështirë, "kur ai është i sulmuar nga raporte ndërkombëtare, arrestime të shumta dhe kur dyshohet për lidhje me trafiqe", u shpreh Braçe. Zoti Patozi, shtoi ai, ka të drejtën të merret me axhendën e punës së grupit të tij parlamentar, por nuk mund të shkruajë atë të Partisë Socialiste. PS nënvizon se këto dy axhenda janë krejt të ndryshme nga njëra-tjetra për shkak se opozita nuk mund të merret me çështje qesharake. Prioriteti i parë i opozitës shfaqet ndërhyrja në Kodin Zgjedhor, diçka për të cilën është ndërmarrë angazhim të mbyllet brenda muajit shtator. Edhe këtë, Braçe e shikon me dyshim teksa thotë se "në deklaratat e zotit Patozi vihet re mungesë angazhimi".