Hallaçi, gati ta braktisë Partizanin

Do të bëjë prishje të njëanshme të kontratës, pas mosshlyerjes së detyrimeve financiare

Edhe pse Partizanit i është afruar një tjetër sponsor, gjë e cila mendohej se do të përmirësonte gjendjen financiare të klubit, kriza ekonomike te të kuqtë njeh edhe një tjetër "viktimë", ose thënë ndryshe një tjetër "rebel". Ai është mesfushori i të kuqve, Rrahman Hallaçi. Divorci mes tij dhe skuadrës së Partizanit është më pranë se asnjëherë. Lajmi është bërë i njohur nga burime pranë vetë lojtarit, të cilat sigurojnë se "sot pritet vendimi përfundimtar i tij, në lidhje me të ardhmen".

Kontrata

Largimi i tij i mundshëm është përfolur shumë në ditët e kaluara, ndërkohë që dita e sotme pritet të zyrtarizojë edhe prishjen e njëanshme të kontratës nga lojtari kuksian, i cili militon në radhët e të kuqve që nga sezoni 2000-2001. Shkaku është ai i mosshlyerjes së detyrimeve financiare. Sikurse është bërë e ditur, Hallaçi nuk ka marrë ende rrogën e gjashtë muajve. Dhe një gjë e tillë e ka shtyrë atë drejt mendimit për t‘u larguar. Edhe pse ishte shprehur ditë më parë për mundësinë e largimit, ai i ka lënë kohë presidentit Albert Xhani për të shlyer të gjitha detyrimet deri ditën e djeshme. Por deri në orët e para të mbrëmjes asgjë nuk është konkretizuar.

Divorci

Për këtë arsye, mësohet se ai tashmë shikon si të vetmen zgjidhje divorcin me klubin, i cili e bëri të njohur në nivelet e larta të kampionatit shqiptar të futbollit. Mënyra e zgjedhur për të konkretizuar këtë divorc është ajo e prishjes së kontratës së njëanshme, që vjen si pasojë e mosrespektimit të kontratës nga ana e klubit. Për një gjë të tillë, ai duket se ka ndërmend t‘i drejtohet Komisionit të Disiplinës, në Federatën Shqiptare të Futbollit. Ndarja me të kuqtë pritet të bëhet realitet që në stërvitjen e sotme, ku me shumë mundësi nuk do të jetë nën urdhrat e trajnerit Hasan Lika.

I fundit

Nëse një gjë e tillë do të bëhet realitet, Hallaçi do të jetë lojtari i radhës, që largohet nga të kuqtë në këtë sezon për shkak mosshlyerjes së detyrimeve të parashikuara në kontratë nga ana e klubit. Ai do t‘i bashkohet grupit të të larguarve për të njëjtën arsye, Paulin Dhëmbi (te Vllaznia), Blendi Shkëmbi (te Skënderbeu), Tefik Osmani (Tirana), Bledar Devolli (Tirana), Arbër Abilaliaj (Besa). Mes të larguarve llogaritet edhe kapiteni Ardit Beqiri, edhe pse për momentin çështja e tij është në shqyrtim nga Komisioni i Disiplinës në FSHF. Po ashtu edhe sulmuesi Gjergj Muzaka nuk ka ndërmend të rikthehet në skuadër, pas incidentit me presidentin Xhani, pas ndeshjes së humbur 1-3 ndaj Shiroki Brijeg.

Bakaj

Largimet e shumta kanë bërë që nga skuadra, e cila u shpall nënkampione e Shqipërisë, të mbeten vetëm dy të rikthyerit, Orges Shehi dhe Dritan Babamusta, por edhe mesfushori Elis Bakaj. Edhe ky i fundit ka shprehur dëshirën për të lënë Partizanin, por presidenti Xhani ka vënë si kusht një dëmshpërblim shumë të majmë për kartonin e tij. Për momentin, Bakaj vuan një dëmtim, dhe në ndeshjen e të dielës, në Lushnje, nuk do të jetë në dispozicion të trajnerit. Në ekip është afruar i riu Marlota, ish-futbollisti i Besëlidhjes, por edhe i ekipit tonë Shpresa, i cili ka dalë në stërvitje me pjesën tjetër të skuadrës.