Shpërthen avioni: digjen të gjallë 150 pasagjerë

Tragjedia ndodhi në aeroportin Barajas, në Madrid

Një avion spanjoll që ishte nisur në
drejtim të Ishujve Kanarie është përfshirë
nga flakët dhe është ndarë në disa
pjesë, ndërsa po tentonte të shkëputej
nga pista për të nisur fluturimin. Tragjedia
ndodhi në aeroportin madrilen, Barajas.
Sipas shifrave të para mendohet se
150 vetë kanë vdekur dhe ata që mund
të ketë shpëtuar nga 166 personat që
ndodheshin në bord duhet të jenë në
gjendje shumë të rëndë. Sipas një oficeri
policie, trupat e pasagjerëve ishin aq të
nxehtë saqë skuadra e ndihmës së shpejtë
e ka pasur shumë të vështirë që t‘i
prekte. Në vendin e ngjarjes kanë mbërritur
menjëherë e me urgjencë ambulancat
e para për të shpëtuar sa më shumë
persona që të ishte e mundur. Kryeministri
i vendit ka ardhur me të shpejtë nga
pushimet në jug të Spanjës dhe ka nxituar
drejt Madridit, drejt e në aeroport. Sipas
disa burimeve mendohet se kanë
mundur të shpëtojnë 26 persona, por
gjendja e tyre është shumë e rëndë. Avioni
i Spainair, fluturimi JK 502 i nisur për
në Ishujt Kanarie që ndodhen në perëndim
të Afrikës, ka pasur një ngritje të
shqetësuar, është përfshirë nga zjarri dhe
është ndarë copash. Nga informacionet
e aeroportit, avioni u nis një orë me
vonesë, për shkak të një defekti që ka
pasur. Nuk dihet ende se për çfarë lloj
defekti bëhet fjalë. Sapo janë vënë re
shenjat e para të anomalisë në vendngjarje,
veç ambulancave e skuadrave të
shpëtimit kanë mbërritur edhe shumë helikopterë.
Avioni "Boeing" MD-82 do të
nisej nga Madridi dhe sipas disa burimeve
pjesa më e madhe e pasagjerëve
në bord ishin turistë dhe familjarë.