Zanier: UNMIK-u do të qëndrojë kryesisht në vendbanimet serbe

Shefi i administratës së OKB-së shpjegon rikonfigurimin e misionit

Me gjithë pritjet për reduktimin e stafit të UNMIK-ut dhe shtrirjen e EULEX-it, shefi i administratës ndërkombëtare, Lamberto Zanier, tha se UNMIK-u do të ruajë praninë e vet në vendbanimet me popullatë serbe apo me popullatë të përzier.

Procesin e rikonfigurimit të administratës së Kombeve të Bashkuara, shefi i kësaj administrate, Lamberto Zanier, e ka cilësuar si proces që pasqyron gjendjen e re në terren. Ndërsa UNMIK-u do të reduktojë stafin, EULEX-i do të shtrihet në terren. Ai megjithatë tha se UNMIK-u do të ruajë një prani të vetën në Kosovë, sidomos në vendbanimet me popullatë serbe, apo me popullatë të përzier. "Ne do të mbetemi të pranishëm në Pejë, Graçanicë, Shtërpcë dhe sigurisht edhe në Mitrovicë", tha Zanier, në një takim me gazetarët. Ndërkaq, lidhur me doganat, Zanier pranoi se është e domosdoshme që në veri të Kosovës të shtrihet pushteti legal, pasi që atje gjithçka është jashtë kontrollit, çka vlerësohet se po shfrytëzohet për kontrabandë dhe kalime të pakontrolluara të mallrave. Por, as sot Zanier nuk dha ndonjë afat se kur do të kthehet rendi në pikat doganore në veri dhe nuk përmendi ndonjë masë që mund të ndërmerret atje. Shefi i Misionit të Kombeve të Bashkuara e ka demantuar sot përfundimisht se ai ka propozuar që të krijohet një lloj force policore serbe brenda Shërbimit Policor të Kosovës. Ndonëse ky demant erdhi disa javë pasi ishte publikuar në media, Zanier tha se ai s‘mund të reagonte më herët, pasi ndodhej në pushimet e verës. Gjatë kësaj kohe ai tha se kishte lexuar për çështje të cilat nuk reflektonin më deklaratat dhe qëndrimet e tij politike. Në takimin me ministrin serb, Zanier tha se Bogdanoviç i kishte kërkuar atij që policët serbë të jenë nën komandën e UNMIK-ut. Në këtë kërkesë, Zanier tha se i kishte thënë ministrit Bogdanoviç se tranzicioni ka përfunduar dhe se policët serbë duhet të jenë pjesë e komandës unike të policisë së Kosovës. "Kam dëgjuar dhe lexuar se kishte ide për krijimin e komandës së ndarë për policët serbë. Më duhet të sqaroj se unë kurrë nuk e kam përmendur një gjë të tillë me ndokënd", tha shefi i UNMIK-ut, Lamberto Zanier. Udhëheqësit e institucioneve më të larta shtetërore të Kosovës vlerësojnë se marrëveshja e nënshkruar ndërmjet misionit të Organizatës së Kombeve të Bashkuara dhe atij të Bashkimit Evropian është një hap i rëndësishëm në procesin e bartjes së kompetencave të mbetura nga institucionet ndërkombëtare tek institucionet e Kosovës. Presidenti i Kosovës, Fatmir Sejdiu, tha se marrëveshja "nuk ka të bëjë vetëm me angazhimet e ardhshme të UNMIK-ut dhe EULEX-it në Kosovë, por, para së gjithash, me kalimin e përgjegjësive të mbetura nga institucionet ndërkombëtare tek ato vendore". "UNMIK-u do t‘i reduktojë kompetencat e veta. Pra, do të jetë një periudhë e transferimit të lehtë apo tranzicionit në institucionet e Kosovës, që është parësorja dhe EULEX do të ketë mandat ndihmëtar në fushën e sigurisë e të sundimit të ligjit", ka deklaruar ai. Presidenti i Kosovës ka thënë se marrëveshjen midis UNMIK-ut e EULEX-it e konsideron si pjesë të marrëveshjes për rikonfigurimin e shpejtë të UNMIK-ut dhe ka shprehur dëshirën që ky proces të kryhet sa më shpejt.