Betohen anëtarët e rinj të KQZ-së

Presidenti i Republikës së Kosovës, Fatmir Sejdiu, ka emëruar anëtarët e Komisionit Qendror Zgjedhor. Ata janë: Zait Xhemajli (kryetar), Xhelil Pajaziti (PDK), Betim Gjoshi (PDK), Florian Dushi (LDK), Sabit Rrustemi (LDD), Fadil Maloku (AKR), Blerim Burjani (AAK), Goran Zdravkoviq (SLS), Bajram Latifi (Koalicioni VAKAT), Vehibe Karahoda (PDT), Albert Kinolli (PRB). Anëtarët e sapoemëruar të komisionit sot dhanë betimin para Presidentit Sejdiu, i cili u kërkoi ta respektojnë ligjin dhe të jenë të paanshëm e profesionalë. "Është shumë e rëndësishme që ata të prezantojnë profesionalizëm, të prezantojnë paanshmërinë dhe të vërtetën. Pra, të bëjnë luftë për të vërtetën, gjatë verifikimit të rezultateve, bërjen e punës më të mirë të mundshme në mandatin që do të kenë", theksoi ai. Presidenti Sejdiu tha se shumica e anëtarëve të KQZ-së kanë përvojë në përgatitjen e procesit zgjedhor. Kryetari i KQZ-së, Zait Xhemajli, tha se komisioni do të marrë të gjitha masat për përgatitjen e zgjedhjeve të lira dhe demokratike. "Ne, si anëtarë të KQZ-së, do të përpiqemi të realizojmë detyrat që shtrohen para nesh", tha Xhemajli. Komisioni Qendror i Zgjedhjeve është organ i përhershëm që përgatit, mbikëqyr, drejton dhe verifikon të gjitha veprimet që kanë të bëjnë me procesin e zgjedhjeve e referendumeve dhe i shpall rezultatet e tyre.