Peshkimi, nafta do ndahet me tollona

Furnizimi i peshkatarëve do të bëhet në varësi të fuqisë motorike dhe orëve të lundrimit. Për abuzuesit, nafta do lyhet me ngjyrë

Hyn në fuqi ligji që u jep të drejtën anijeve të peshkimit të furnizohen me karburant pa paguar akcizë. Bashkë me ligjin, Ministria e Financave dhe Ministria e Ujërave ka paraqitur edhe udhëzimin se si do të veprohet nga ana e këtyre subjekteve, në mënyrë që të përfitojnë karburant pa akcizë, ku ndryshe nga herët e kaluara, çdo dalje në det duhet të jetë e matur mirë, deri në minuta. Kjo, pasi konsumi i karburantit për peshkimin është përllogaritur në varësi të fuqisë motorike dhe orëve të lundrimit. Në këtë pikë, anijet e peshkimit do të kenë të matur çdo veprim, në mënyrë që karburanti të jepet ashtu sikurse e parashikon ligji, me tollona. Për të shmangur abuzimet, ekspertët e ministrisë kanë menduar të përdorin një lloj ngjyre, e cila do të identifikojë naftën që është shpërndarë pa akcizë.

Peshkimi

Në radhë të parë, subjekti privat duhet të jetë i pajisur me leje peshkimi, duke iu referuar ligjit 8450, kurse lidhur me TVSH-në, kjo pikë është tepër e rëndësishme që të merret në konsideratë, pasi furnizimi nga magazinat doganore do të bëhet vetëm në rastet kur paraqitet fatura e shitjes. Para se të arrihet në këto dy hallka, subjekti i peshkimit duhet të regjistrohet te tatimet, në rast të kundërt nuk përfiton naftë pa akcizë. Për sa i përket çmimit, do të përllogaritet ajo vlerë në ditën kur është furnizuar subjekti, pa akcizë, por me TVSH, e cila do të jetë e kreditueshme për anijen e peshkimit që blen naftë. Furnizimi i këtyre të fundit me karburant do të bazohet mbi normativat e konsumit të naftës sipas anijeve dhe llojit të peshkimit, por që në asnjë rast vlera e përgjithshme e karburantit të furnizuar, gjatë një 6-mujori, nuk mund të jetë më e madhe se 80 për qind e vlerës së përgjithshme të produktit të peshkimit, shitur me faturë tatimore, me TVSH. Në rast të kundërt, degët e tatim-taksave njoftojnë subjektin për ndërprerjen e furnizimit me karburant.

Ngjyra

Policia tatimore ka të drejtë të kontrollojë serbatorët e automjeteve, pikat e tregtimit me pakicë të karburanteve, si dhe të gjitha subjektet që nuk përfitojnë karburant me ngjyrosës fiskal. Ky ngjyrosës fiskal do të ketë standardin e BE-së (solven yellow_124), me emër shkencor N-etil, ndërsa niveli i ngjyrimit është jo më pak se 6 mg/litra karburant dhe jo më shumë se 9 mg/litra. Vendimi ka hyrë dje në fuqi dhe është gati për t‘u zbatuar si nga ana e subjekteve private, ashtu edhe të strukturave tatimore, si dhe të inspektoratit të peshkimit.




Fatura

Në asnjë rast vlera e përgjithshme e karburantit të furnizuar gjatë një 6-mujori nuk mund të jetë më e madhe se 80% e vlerës së përgjithshme të produktit të peshkimit, të shitur me faturë tatimore



Norma e konsumit


Peshkim fundor - Pellagjik

a-anije peshkimi 150 hp,

konsumi maksimal 29,3 litra/orë dhe konsumi mesatar 20,5 litra/orë

b-anije peshkimi 300 hp,

konsumi maksimal 58,2 litra/orë dhe konsumi mesatar 40,8 litra/orë

c-anije peshkimi 400 hp

konsumi maksimal 78,4 litra/orë dhe konsumi mesatar 54,9 litra/orë

d-anije peshkimi 600 hp

konsumi maksimal 117,6 litra/orë dhe konsumi mesatar 82,3 litra/orë

e-anije peshkimi 1000 hp

konsumi maksimal 196 litra/orë dhe konsumi mesatar 137 litra/orë

Peshkim me rrethim

a-anije peshkimi 80-600 hp

konsumi maksimal 58 litra/orë dhe konsumi mesatar 29 litra/orë

Peshkim selektiv

a-anije peshkimi 80 hp

konsumi maksimal 17 litra/orë dhe konsumi mesatar 12 litra/orë

b-M/Flluga peshkimi 40 hp

konsumi maksimal 8 litra/orë dhe konsumi mesatar 5,6 litra/orë

c-M/lanca peshkimi 20 hp

konsumi maksimal 4 litra/orë dhe konsumi mesatar 2,8 litra/orë

d-M/lanca peshkimi 10 hp

konsumi maksimal 2 litra/orë dhe konsumi mestar 1,4 litra/orë


Shembujt

Si bëhet llogaritja

Në përllogaritjen e konsumit faktik të karburantit për anije dhe varka të ndryshme peshkimi janë marrë në konsideratë një sërë alternativash. Kështu, gjysmë ore kërkohet për ndezje motori në bankinë para nisjes për të arritur parametrat teknikë të punës, si dhe praktikë nisjeje. Në Durrës dhe Vlorë, dy orë ecje e lirë deri në zonën e peshkimit dhe dy orë kthim në port, ndërsa në Shëngjin dhe Sarandë, një orë ecje deri në zonën e peshkimit dhe një orë kthim në port. Sipas përllogaritjeve të bëra nga Ministria e Financave, në bashkëpunim me Ministrinë e Ujërave, del se 20 për qind e kohës në peshkim llogaritet për lëshimin e veglave të peshkimit, ndërsa 10 për qind ecje e lirë, me motor në minimum, grisje e karikim trate, kolaudim, pajisje peshkimi etj. Pjesa e mbetur është kohë pune efektive. Po ashtu janë marrë edhe rastet e kthimit në port pa peshkim, për shkak të kohës së keqe apo defekteve. Të gjitha këto përllogaritje kanë si qëllim të përcaktojnë vetëm konsumin orar të karburantit, e për rrjedhojë sasia e karburantit që do të rimbursohet del nga koha e punës faktike në det të anijes, shumëzuar me konsumin e aprovuar në orë të paraqitur te tabela.