Misha Gleni, konsulent i disa qeverive perëndimore

Kush është publicisti i njohur që zbuloi prapaskenat e krimit ballkanik

Misha Gleni është një gazetar dhe historian i njohur. Si gazetar i mediumeve britanike të njohura, "Guardian" dhe BBC për Evropën Qendrore, ai ka dhënë informacione për rënien e komunizmit dhe luftërat në ish-Jugosllavi. Laureat i shumë çmimeve, midis të cilëve edhe i çmimit "Sony" për kontributin në gazetarinë elektronike, për informimet mbi Jugosllavinë e atëhershme, ai ka shkruar tre libra për Evropën Lindore dhe Ballkanin (në gjuhën serbe janë botuar në botimin "Samizdat B92" - "Rënia e Jugosllavisë" dhe "Ballkani mes viteve 1804 dhe 1999"). Po ashtu, ai ka shërbyer si konsulent i qeverive të disa shteteve evropiane dhe të SHBA-së lidhur me çështjet politike të rajonit. Gjatë kohës së krizës dhe shpërbërjes së bashkësisë shtetërore jugosllave, ai ka shërbyer si gazetar i shërbimit botëror të BBC-së nga Evropa Qendrore. Libri "Rënia e Jugosllavisë" i dha atij reputacionin e një njohësi kompetent të problematikës së komplikuar të rajonit ballkanik. Libri i tij për Ballkanin, në të njëjtën kohë përbën, krahas përpjekjes që botës dhe mjediseve jashtëballkanike t‘ua afrojë dhe t‘ua shpjegojë më mirë Ballkanin në një kontekst të gjerë, një kontribut mjaft të vlefshëm për studimin e Ballkanit, të shteteve që e përbëjnë dhe të popujve që jetojnë atje. Gjatë tre vjetëve, z. Gleni ka drejtuar një OJQ dhe ka kontribuar me projekte për rindërtimin e Serbisë, Maqedonisë dhe të Kosovës. Tani ai jeton në Londër. Libri i Misha Glenit, "MekMafia - kriminaliteti pa kufi" do të dalë në qarkullim në botimin e "Samizdat B92" në fund të muajit gusht.