Post-Ferguson, edhe Lipi mes kandidatëve

Për stolin e Mançester Junajted fliten edhe O‘Nill, Hjuxhs, Kueiroz, Kin e Murinjo

Sër Aleks Ferguson do të ketë një rol mjaft të rëndësishëm në përzgjedhjen e pasardhësit të tij te Mançester Junajted. Mes emrave që qarkullojnë për të ardhmen e stolit të "Djajve të Kuq", ku nuk mungojnë trajnerët e mirënjohur në arenën ndërkombëtare, nuk mungon as Marçelo Lipi. Trajneri i rikthyer në krye të kombëtares italiane është njohje e vjetër e skocezit, i cili në të kaluarën e ka përkufizuar me shaka "bastard i mallkuar me pamje të bukur". Shefi ekzekutiv i Mançesterit, David Gill, ka filluar kërkimin për zëvendësuesin e Sër Aleks dhe shpjegoi se trajneri aktual do të ketë një rol shumë të rëndësishëm në zgjedhjen e personit që do të zërë vendin e tij pas tre vjetësh. Gill shpjegoi se është e domosdoshme që një teknik, i cili ka qëndruar kaq gjatë në krye të skuadrës (sezoni i ri do të jetë i 23-ti për të), të marrë pjesë në këtë vendim delikat, pavarësisht faktit se Ferguson preferon që mos të përfshihet në këtë çështje. "Unë dhe familja Glejzër jemi dakord në këtë pikë dhe kushdo që i njeh punët e brendshme të klubit e di mirë se një zgjidhje tjetër nuk mund të konceptohet", shpjegoi shefi ekzekutiv. "Normalisht, edhe pronarët do të jenë pjesë aktive e zgjedhjes së trajnerit të ri dhe do të thonë fjalën e fundit, pasi figura e trajnerit është tejet e rëndësishme për Junajted. Duhet të jeni të sigurt se do të jetë një ndryshim shumë i madh, por rreth emrit të drejtuesit të ri të stolit nuk ekziston asgjë e pamundur. Trajneri i ri do të gjendet në një klub solid, me një skuadër fantastike, një stadium të jashtëzakonshëm dhe i rrethuar nga tifozë të shkëlqyer". Duke u nisur nga këto fjalë, gazetat britanike kanë "shkrirë" të gjithë fantazinë, duke publikuar listën me kandidatët e mundshëm për erën "post-Ferguson". Madje, nuk ka munguar as kuotimi nga "bookmaker"-sat. Favoriti kryesor për këtë detyrë jepet Martin O‘Nill (fitorja e të cilit kuotohet 4 me 1), pas tij vjen Mark Hjuxhs (7 me 1), Karlos Kueiroz, ish-krahu i djathtë i Ferguson, që tashmë ka marrë drejtimin e kombëtares portugeze, Roi Kin, i cili aktualisht drejton Sandërlendin dhe Stiv Brus, ish-kapiten i Junajted. Por, gazetat "Daily Telegraph" e "Daily Star" kanë "sponsorizuar" edhe Lipin, që në tre vitet e ardhshme mund të perfeksionojë gjuhën angleze. Tjetër kandidat potencial vlerësohet Hoze Murinjo, që pavarësisht rivalitetit, mes tij dhe Ferguson ekziston respekti dhe vlerësimi reciprok.