Vrapi e Fagu, drejt Elbasanit

Transferimi te grekët e Trasivulos Fylis, vetëm në janar

Endri Vrapi dhe Erbim Fagu do të jenë përforcimet më të fundit të Elbasanit. Verdheblutë synojnë ndërtimin e një skuadre konkurruese dhe me dy ish-lojtarët e Tiranës, në sezonin e ri ata do të pretendojnë që të paktën të jenë në luftën për një vend në kupat e Evropës. Vrapi dhe Fagu kanë zhvilluar një periudhë prove tek ekipi i Superligës greke, Trasivulos Fylis, madje duke qenë fare pranë nënshkrimit. Por firma nuk ka ardhur, pasi drejtuesit e klubit kanë kërkuar që fillimisht futbollistët të zhvillojnë fazën përgatitore me pjesën tjetër të ekipit. Kjo vonesë, e cila më vonë mund t‘i penalizonte në gjetjen e një ekipi, i ka detyruar mbrojtësin dhe mesfushorin me tipare sulmuese që të shtyjnë akordin me Trasivulos për në merkaton e janarit. Në fundjavë ata do t‘i bashkëngjiten Elbasanit, edhe sepse klubi verdheblu i ka kërkuar me ngulm shërbimet e tyre për kampionatin 2008/09. Një tjetër futbollist shqiptar pranë transferimit te klubi helen ishte edhe portieri Ervin Llani.