Daniel Godeli, tri medalje ari në Evropianin U-17 të Peshëngritjes

Arritje e shkëlqyer e peshëngritësit nga Shtërmeni, që dominon në peshën 62 kg në Amiens të Francës

Peshëngritja vazhdon të jetë sporti më cilësor në Shqipëri. Rezultati më i fundit i jashtëzakonshëm ka ardhur nga Daniel Godeli, që në Kampionatin e 11 Evropian të Peshëngritjes për U-17 ka fituar tri medalje ari. Sportisti nga Shtërmeni ka dominuar totalisht garën në peshën 62 kg në Amiens të Francës dhe në fund u shpall kampion kontinental. Godeli la pas 51 konkurrentë të tjerë, duke u ngjitur tri herë në vendin më të lartë në podium. Megjithatë, gara e tij nuk ishte aspak e thjeshtë. Kjo mbi të gjitha në stilin e shkëputjes, ku triumfoi pasi ngriti 118 kg, ndërkohë që ndjekësi i tij më i afërt ka ngritur vetëm 1 kg më pak. E kundërta ka ndodhur në shtytje, ku Godeli dominon, madje tenton të regjistrojë edhe rekord evropian për 17-vjeçarë. Në provën e parë ai ngre me sukses 140 kg, e po kaq e suksesshme është edhe prova e dytë, me 145 kg. Duke qenë se prova e dytë i kishte siguruar medaljen e artë në shtytje dhe në dygarësh, peshëngritësi nga Komuna e Elbasanit provon edhe "goditjen e madhe". Në tentativën e tretë ai kërkon peshën 154 kg, duke synuar të thyente rekordin kontinental, por nuk ia ka arritur. Godeli kryesoi edhe klasifikimin në dygarësh, me peshën e përgjithshme 263 kg. Presidenti i Federatës së Peshëngritjes, Esat Ademi, që ka shoqëruar në Francë ekipin e të rinjve kuqezi, u shpreh mjaft entuziast. "Është një arritje e jashtëzakonshme kjo e Godelit", tha ai nëpërmjet linjës telefonike për "Shqip". "Tri medalje të arta në Kampionatin Evropian shënojnë një tjetër majë të peshëngritjes shqiptare". Më tej Ademi shtoi: "Gara ishte relativisht e vështirë, mbi të gjitha në stilin e shkëputjes, ku me 118 kg të ngritura Godeli fitoi arin vetëm për 1 kg, pasi rivali i tij turk ngriti 117. Jemi shumë të lumtur, pasi kishim shpresa te ky sportist. Për t‘u vlerësuar është edhe puna e mirë e trajnerit të Godelit, Ali Lunaxhiu. Një tjetër peshëngritës, tek i cili shpresojmë shumë në këtë aktivitet, është edhe Xhulio Prroni". Paraqitja e sportistit të talentuar është ndjekur nga afër edhe nga ambasadori shqiptar në Francë, Ylljet Aliçka. Madje, ka qenë kreu i përfaqësisë diplomatike ai që i ka varur në qafë Godelit medaljet e fituara me meritë.