Strategjia, Tirana forcohet duke i dobësuar rivalët

Duhen 4-5 lojtarë cilësorë, në shënjestër pikat e forta të kundërshtarëve

Që Tirana të arrijë të shpallet kampione, asaj i duhet një strategji e mirrëfilltë. Dhe kjo gjë duket se nuk i mungon, edhe pse zyrtarisht askush nga drejtuesit nuk e pohon. Kjo strategji ka në themelet e saj një filozofi të njohur, atë të "përforcimit duke dobësuar rivalët". Përveç blerjeve nga jashtë vendit, drejtuesit e klubit bardheblu kanë vënë në shënjestër edhe lojtarët më të mirë të konkurrentëve në luftën për titull, duke synuar që "me një gur të vrasë dy zogj": Forcohet duke u marrë kundërshtarëve lojtarët e konsideruar si pikat më të forta dhe njëkohësisht i dobëson ata. Edhe pse nuk ka konfirmim zyrtar, aplikimi i planit strategjik tashmë ka filluar. Nga stafi i trajnerëve mësohet se duhet ende kohë për t‘u quajtur ekip i kompletuar. Janë të domosdoshëm edhe 4-5 lojtarë cilësorë. Kjo është një kërkesë e trajnerit kroato-boshnjak, Blazhe Slishkoviç, që është konfirmuar dje edhe nga vetë presidenti Refik Halili. Sipas tij, përveç lojtarëve nga kampionati shqiptar, do të ketë edhe futbollistë të huaj. Por, megjithatë, nën rrogoz tashmë, lëvizjet për t‘u rrëmbyer rivalëve pjesët më të çmuara, kanë filluar. Sipas burime pranë klubit, në listën e përforcimeve janë dy futbollistë të kampiones së Shqipërisë, Dinamos. Emrat zyrtarë mungojnë, por sipas të gjitha gjasave, është e sigurt që njëri prej dinamovitëve që synohet është Arjan Pisha, i cili gjithsesi do ta ketë të vështirë largimin e tij nga blutë. Nuk i shpëton kësaj strategjie as Partizani, i cili ka në gjirin e tij dy lojtarë shumë të lakmuar nga Tirana, që pëlqejnë Bajn dhe Muzakën, që synojnë të luajnë në ndonjë kampionat të huaj. Besa tashmë është dorëzuar para bardhebluve, të cilëve nuk ua mbajti dot mbrojtësin i Kombëtares U-21, Andli Lilën. Ky i fundit ka firmosur kontratën me kryeqytetasit. Një tjetër rival për titull i klubit të drejtuar nga presidenti Halili është edhe Vllaznia. Shkodranët kanë rritur një futbollist, të lakmuar edhe në kampionatet perëndimore, nga ku ai së fundmi mësohet se ka oferta. Bëhet fjalë për talentin e ri, Gilman Likën, i cili prej disa javësh kërkon leje nga Vllaznia për t‘u provuar në njërin nga klubet që i ka bërë ofertë. Mësohet se kontaktet me të nuk kanë munguar. Por arritja e një marrëveshjeje është kushtëzuar edhe nga fakti se futbollisti i ri kërkon shumë. Për momentin nuk ka akord, por shpresat që situata të ndryshojë janë të mëdha. Sigurisht, drejtuesit e Tiranës një sy e mbajnë hapur edhe në merkaton e futbollistëve të huaj. Prej kohësh janë në pritje të stoperit kroat, Stanisha Nikoliç, i cili është një futbollist i premtuar nga vetë trajneri Slishkoviç. Nikoliç është një njohje e vjetër e trajnerit kroato-boshnjak, pasi ai e ka stërvitur vetë atë për dy vjet, kur drejtonte një skuadër boshnjake. Po ashtu Slishkoviç ka marrë viston për të sjellë te bardheblutë edhe dy futbollistë ballkanas, të cilët, me shumë mundësi, do të jenë kroatë. Por Slishkioviç kërkon domosdoshmërisht një mesfushor, që të jetë në gjendje të bëjë ndryshime.