Basha përshëndet takimin Rajs-Sejdiu-Thaçi

Ministria e Punëve të Jashtme përshëndeti takimin e Sekretares Amerikane të Shtetit, Kondolesa Rajs, me liderët më të lartë të shtetit të Kosovës, Presidentin Fatmir Sejdiu dhe Kryeministrin Hashim Thaçi dhe e konsideron atë si historik. Ky takim është një shprehje e qartë e vlerësimit dhe miratimit të punës së institucioneve të Kosovës, të progresit të dukshëm të saj, në procesin e kosolidimit të demokracisë, të shtetit të së drejtës dhe zbatimit rigoroz të ligjit.

Ministria e Punëve të Jashtme përshëndeti gjithashtu edhe angazhimin konstant të mikut të madh të Republikës së Kosovës, Shteteve të Bashkuara të Amerikës në rrugën e saj drejt lirisë dhe pavarësisë dhe në fazën e ndërtimit të shtetit demokratik, me vision të qartë europian, në shërbim të të gjithë qytetarëve, pavarësisht nga përkatësia etnike, si dhe për ndihmën financiare, përfshirë edhe shumën prej 400 milionë dollarësh të ofruar në Konferencën e Donatorëve.

Ky dikaster ndan të njëjtin vlerësim me Sekretaren Rajs se udhëheqja e Kosovës është e aftë dhe e përkushtuar dhe për të ardhmen evropiane të vendit. Kosova e pavarur është tashmë një realitet i pakthyeshëm dhe njohja e saj ndërkombëtare, e pandalshme. Perspektiva e saj, së bashku me Shqipërinë, Maqedoninë, Malin e Zi, Serbinë dhe Bosnje -Hercegovinën, është në familjen evropiane e euroatlantike, duke hequr çdo shpresë të atyre që nuk e kanë dashur e as nuk e duan Kosovën e pavarur, Ballkanin e qetë dhe stabil.