Kapllani, rekord golash në miqësore

Forma e mirë e Edmond Kapllanit në këtë fillim sezoni konfirmohet nga golat që sulmuesi shqiptar ka shënuar në miqësoret e luajtura deri më tani me Karlsruhen. Në gjashtë ndeshje miqësore skuadra nga Baden-Baden ka realizuar 51 rrjeta, dhjetë prej të cilave mbajnë firmën e lojtarit të Kombëtares shqiptare. Goli më i fundit ishte ai i së mërkurës, në sfidën me amatorët e Kupenheimit, ku në të 21-ën shënoi golin e parë në fitoren 6-1, megjithatë gjashtë minuta më pas Kapllani u duk i nervozuar dhe u ndëshkua me karton të kuq. Moment të mirë po kalon edhe Ervin Skela, i cili shënoi dy gola në fitoren 3-0 që Energie Kotbus arriti përballë skuadrës së Kategorisë së Parë çeke, FK Jablonec. Loja e fantazistit vlonjat u vlerësua mbi të gjitha për veprimet e bukura në fushë dhe formën e jashtëzakonshme në këtë fillim sezoni. Të premten Kotbus do të ndeshet me Erzgebirge Aue nga Bundesliga 2, klub ku militon sulmuesi shqiptar Skerdilajd Curri. Ndërkohë, dje skuadra e Premiershipit, Uest Hem, ka anonçuar blerjen e parë të madhe të verës: Valon Behrami. 23-vjeçari që luan me kombëtaren zvicerane ka pranuar termat personale me drejtuesit e klubit. Tashmë mbetet gjetja e marrëveshjes me Lacion: italianët pretendojnë afro 5 milionë euro për kartonin e Behramit, ndërsa Uest Hem shpreson të paguajë 2,5 milionë.